Sikkim Flood : सिक्कीममध्ये ढगफुटी, काळजाचा थरकाप उडवणारी दृश्ये; हजारो पर्यटक अडकले
Sikkim Flood Update : सिक्कीममध्ये महापूर आला आहे. अचानक झालेल्या ढगफुटीमुळे हाहा:कार उडाला आहे. सिक्कीममध्ये सध्या हजारो पर्यटक अडकले आहेत. तर 14 जणांचा मृत्यू झाला आहे. पंतप्रधान मोदी यांनी सिक्कीमच्या मुख्यमंत्र्यांना मदतीचं आश्वासन दिलंय. वाचा सविस्तर...
सिक्कीममध्ये सध्या महापुराची स्थिती आहे. ल्होनक तलावाच्या परिसरात अचानक ढगफुटी झाली आहे. त्यामुळे तीस्ता नदीला पूर आलाय. यामुळे नदीकाठच्या लोकांचं मोठं नुकसान झालंय.
सिक्कीममध्ये आलेल्या या पुरात आतापर्यंत 14 जणांचा मृत्यू झाला आहे. तर 23 जवानांसह 102 जणांशी अद्याप कोणताही संपर्क होऊ शकलेला नाही. तर 3000 पर्यटकही सिक्कीममध्ये अडकले आहेत.
तीस्ता नदीची पाणी पातळी 15 ते 20 फुटांनी वाढली आहे. त्यामुळे राष्ट्रीय महामार्ग 10 देखील पाण्याखाली गेला आहे.
सिक्कीमच्या मंगन जिल्ह्यातील लोनाक सरोवराच्या भागात पूरस्थिती निर्माण झाली आहे. तीस्ता नदीच्या पाणी पातळीत वाढ झाली आहे. त्यामुळे मंगन, गंगटोक, पाकयोंग आणि नामची या जिल्ह्यांचं मोठं नुकसान झाली आहे.
पंतप्रधान नरेंद्र मोदी यांनी सिक्कीमचे मुख्यमंत्री प्रेमसिंग तमांग यांच्याशी फोनवरून चर्चा केली. सिक्कीमला सर्वोतोपरी मदत करण्याचं आश्वासन दिलं. तर तमांग यांनी पूरग्रस्त सिंगताम भागाला भेट दिली.
