जेम्स अँडरसनने 17 वर्षानंतरच आयपीएल मेगा लिलावात नाव का नोंदवलं? कारण स्वत:च सांगितलं
आयपीएल 2025 स्पर्धेपूर्वी मेगा लिलाव पार पडणार आहे. ही लिलाव प्रक्रिया दोन दिवस असणार आहे. नोव्हेंबर 24 आणि 25 या तारखेला ही लिलाव प्रक्रिया सौदी अरेबियाच्या जेद्दाह येथे होणार आहे. या लिलावात जगभरातील दिग्गज खेळाडूंनी भाग घेतला आहे. यात इंग्लंडचा माजी गोलंदाज जेम्स अँडरसन याचंही नाव आहे.
आयपीएल मेगा लिलावात एकापेक्षा एक खेळाडूंनी नाव नोंदणी केली आहे. त्यामुळे या खेळाडूंना आपल्या ताफ्यात घेण्यासाठी मेगा लिलावात मोठी बोली लागणार यात शंका नाही. मेगा लिलावात इंग्लंडचा माजी वेगवान गोलंदाज जेम्स अँडरसन याचाही समावेश आहे.
जेम्स अँडरसन याने आंतरराष्ट्रीय क्रिकेटमधून निवृत्ती घेतली आहे. यापूर्वी जेम्स अँडरसन कधीच आयपीएल स्पर्धा खेळलेला नाही. पण त्याने पहिल्यांदाच आयपीएल खेळण्याची इच्छा व्यक्त केली आहे. 42 वर्षीय जेम्स अँडरसनने 1.25 कोटी बेस प्राईससह नाव नोंदवले आहे.
अँडरसन इंग्लंडच्या कोचिंग स्टाफचा भाग आहे. नुकताच पाकिस्तान दौऱ्यावर तो इंग्लंड संघासोबत होता. कसोटी क्रिकेटमधील सर्वात यशस्वी वेगवान गोलंदाज म्हणून जेम्स अँडरसनची ख्याती आहे. कसोटीत 700 हून अधिक विकेट घेणारा पहिला वेगवान गोलंदाज आहे.
"माझ्यात आजही काहीतरी निश्चितपणे असल्याचा मी विचार करतो. मी आजही खेळू शकतो. मी कधीच आयपीएल खेळलो नाही. मला याची अनुभूती नाही. याच कारणामुळे मला एक खेळाडू म्हणून देण्यासाठी भरपूर काही आहे." , असं जेम्स अँडरसन याने सांगितलं.
जेम्स अँडरसनने आतापर्यंत फक्त 44 टी20 सामने खेळले आहेत. अँडरसनने 32.41 च्या सरासरीने 41 विकेट घेतल्या आहेत. त्याचा इकोनॉमी रेट हा 8.47 इतका आहे. अँडरसनने शेवटचा टी20 सामना 2010 मध्ये खेळला होता.
