Shivsena | उद्धव ठाकरेंच्या पक्षप्रमुख पदावरच शिंदे गटाचा सवाल! सुप्रीम कोर्टात नीरज किशन कौलांचा मोठा युक्तिवाद

सर्वोच्च न्यायालयात सुरू असलेल्या शिवसेना पक्षाच्या सुनावणीत शिंदे गटाने उद्धव ठाकरे यांच्या पक्षप्रमुख पदाच्या वैधतेवर प्रश्नचिन्ह उपस्थित केले आहे. शिंदे गटाचे वकील नीरज किशन कौल यांनी युक्तिवाद केला की, 2018 च्या पक्षाच्या घटनेनुसार हे पद चुकीचे आहे. 2013 मध्ये बाळासाहेब ठाकरे यांच्या निधनानंतर पक्षप्रमुख पद गोठवण्यात आले होते, असे कौल यांनी न्यायालयासमोर मांडले.

कौल यांनी असाही दावा केला की, ठाकरे गटाने पक्षाची नवीन घटना निवडणूक आयोगात सादर केलेली नाही आणि पक्षाचे स्ट्रक्चर व नवीन प्रतिनिधींची माहिती आयोगाला दिलेली नाही. पक्षांतर्गत लोकशाहीचा अभाव हा देखील त्यांच्या युक्तिवादाचा मुख्य मुद्दा होता. तर ठाकरे गटाचे वकील कपिल सिब्बल यांनी ही फूट केवळ विधिमंडळ पक्षातच असल्याचे म्हटले होते, परंतु नीरज किशन कौल यांनी दोन गटांच्या वेगवेगळ्या बैठका आणि कृतींचा दाखला देत हा युक्तिवाद खोडून काढला. निवडणूक आयोगाला कलम 324 अंतर्गत पक्ष कुणाचा हे ठरवण्याचा पूर्ण अधिकार आहे आणि पक्षाच्या घटनेत लोकशाही व्यवस्था असावी हे सांगण्याचा अधिकारही आयोगाला आहे, यावर शिंदे गटाने भर दिला.