आयपीएल 2025 मेगा लिलावापूर्वीच केएल राहुलने दिले असे संकेत, कोण लावणार बोली?
आयपीएल 2025 मेगा लिलावाबाबत प्रचंड उत्सुकता आहे. कोणत्या खेळाडूसाठी किती बोली लागते याबाबत चर्चांना उधाण आलं आहे. असं असताना केएल राहुलने आपली इच्छा व्यक्त केली आहे. यावरून त्याला आरसीबीकडून खेळायची इच्छा असल्याचं दिसत आहे.
आयपीएलच्या 18 व्या पर्वापूर्वी मेगा लिलाव पार पडणार आहे. या लिलावासाठी दहाही फ्रेंचायझींनी कंबर कसली आहे. खासकरून ऋषभ पंत, केएल राहुल, इशान किशन या खेळाडूंकडे नजरा लागून आहेत. केएल राहुलला लखनौ सुपर जायंट्सने रिलीज केलं आहे. त्यामुळे आता केएल कोणत्या संघाकडून खेळणार याबाबत चर्चा आहे. आपल्या जुन्या फ्रेंचायझीकडून पुन्हा खेळणार का? असा प्रश्न विचारला जात आहे.
केएल राहुलने स्वत: याबाबत इच्छा व्यक्त केली आहे. घरच्या संघाकडून खेळायचं असल्याचं त्याने अनेकदा अधोरेखित केलं आहे. पण मेगा लिलाव 2025 स्पर्धेपूर्वी केएल राहुलने आरसीबीकडून खेळण्याची इच्छा असल्याचं अप्रत्यक्षरित्या सांगितलं आहे.
एका खासगी वृत्तवाहिनीशी बोलताना केएल राहुलने सांगितलं की, मी 2016 मध्ये आरसीबी संघात होतो. तेव्हा मला खेळण्याची मजा घेता आली. बंगळुरु हे माझं मूळ गाव आहे. त्यामुळे बंगळुरुसाठी खेळणे माझ्यासाठी खास होते.
केएल राहुल कोड्यात बोलला असला तरी त्याचं निशाणा आरसीबीकडे असल्याचं चाहते सांगत आहेत. त्यामुळे केएल राहुलसाठी आरसीबी बोली लावू शकते. फाफ डुप्लेसिस संघात नाही, तसेच दिनेश कार्तिकने निवृत्ती घेतली आहे. त्यामुळे केएल राहुलसाठी बोली लावू शकतात.
केएल राहुल आरसीबीसाठी 19 सामने खेळला आहे. यात 14 डावात फलंदाजी करत त्याने 4 अर्धशतकं ठोकली आहेत. तसेच 417 धावा केल्या आहेत. आता मेगा लिलावात केएल राहुलवर किती बोली लागते हे पाहणं औत्सुक्याचं ठरणार आहे.
