याला म्हणतात नशीब, मामासोबत शूटिंग बघायला गेली अन् मिळाली मोठी ऑफर, पण आयुष्यभर ही अभिनेत्री राहिली सिंगल
मामासोबत शूटिंग बघायला गेली आणि तेथील दिग्दर्शकाची नजर तिच्यावर पडली. दिग्दर्शकाने थेट या अभिनेत्रीला दिली होती चित्रपटात काम करण्याची ऑफर. पण आयुष्यभर राहिली सिंगल. कोण आहे ही अभिनेत्री?
हिंदी चित्रपटसृष्टीतील प्रसिद्ध अभिनेत्री आणि गायिका सुरैय्या यांचा जन्म 15 जून 1929 रोजी लाहोर येथे झाला. त्या केवळ एक वर्षांच्या असताना त्यांचे कुटुंब मुंबईत स्थायिक झाले. लहानपणापासूनच त्यांना चित्रपटसृष्टीचे वातावरण लाभले आणि त्यांनी ऑल इंडिया रेडिओच्या बालकार्यक्रमांतून गायनाची सुरुवात केली.
सुरैय्यांच्या आयुष्यातील मोठे वळण तेव्हा आले, जेव्हा त्या आपल्या मामांसोबत ताजमहल चित्रपटाचे शूटिंग पाहण्यासाठी स्टुडिओत गेल्या होत्या. त्यावेळी दिग्दर्शक नानुभाई वकील यांनी त्यांचे साधे, निरागस व्यक्तिमत्त्व पाहून त्यांना चित्रपटात भूमिका दिली. याच क्षणापासून त्यांच्या चित्रपट कारकिर्दीची सुरुवात झाली.
अभिनयासोबतच सुरैय्या यांनी गायिका म्हणूनही मोठी ओळख निर्माण केली. प्रसिद्ध संगीतकार नौशाद यांनी त्यांच्या आवाजातील गोडवा ओळखून त्यांना गाण्याची संधी दिली. 'दिल-ए-नादां तुझे हुआ क्या है', 'तू मेरा चांद मैं तेरी चांदनी', 'वो पास रहे या दूर' यांसारखी अनेक गाणी आजही रसिकांच्या मनात घर करून आहेत.
सुरैय्या यांनी अनेक गाजलेल्या चित्रपटांमध्ये काम केले. त्यांच्या काळात त्यांची लोकप्रियता इतकी मोठी होती की त्या सर्वाधिक मानधन घेणाऱ्या अभिनेत्रींपैकी एक मानल्या जात होत्या.
त्यांची जोडी अभिनेता देव आनंद यांच्यासोबत विशेष लोकप्रिय ठरली. चित्रपटातील ही जोडी वास्तविक आयुष्यातही प्रेमात पडली होती. मात्र कौटुंबिक आणि धार्मिक कारणांमुळे त्यांचे लग्न होऊ शकले नाही. ही प्रेमकथा आजही हिंदी चित्रपटसृष्टीतील सर्वाधिक चर्चित अपूर्ण प्रेमकथांपैकी एक मानली जाते.
