‘तुला पाहते रे’ फेम गायत्री दातारला भेटला खऱ्या आयुष्यातील विक्रांत सरंजामे; बांधली लग्नगाठ
छोट्या पडद्यावरील प्रसिद्ध अभिनेत्री गायत्री दातार नुकतीच लग्नबंधनात अडकली आहे. या लग्नाचे फोटो आणि व्हिडीओ सोशल मीडियावर व्हायरल होत असून त्यावर नेटकरी लाइक्स आणि कमेंट्सचा वर्षाव करत आहेत.
झी मराठी वाहिनीवरील 'तुला पाहते रे' या मालिकेतून घराघरात पोहोचलेली अभिनेत्री गायत्री दातारने तिच्या आयुष्याच्या नव्या प्रवासाला सुरुवात केली आहे. गायत्रीने सोमवारी 27 एप्रिल रोजी श्रीकांत चवरेशी लग्नगाठ बांधली आहे. या लग्नाचे फोटो आणि व्हिडीओ सोशल मीडियावर समोर आले आहेत.
शुक्रवारपासून गायत्रीच्या लग्नापूर्वीच्या विधींना आणि कार्यक्रमांना सुरुवात झाली होती. तिच्या मेहरंदी आणि हळदीचेही फोटो सोशल मीडियावर समोर आले होते. अखेर समुद्रकिनारी गायत्री आणि श्रीकांतचा विवाहसोहळा पार पडला. या लग्नाला कलाविश्वातील काही कलाकारसुद्धा उपस्थित होते.
गायत्रीचा पती श्रीकांत चवरे याने आयआयटी बॉम्बेमधून शिक्षण पूर्ण केलं आहे. तसंच त्याला ड्रोन फोटोग्राफीचीही प्रचंड आवड आहे. श्रीकांतच्या इन्स्टाग्राम प्रोफाइलमधून जाणवतं की त्याला फिरण्याची आणि फोटोग्राफीची विशेष आवड आहे.
माझ्या आयुष्यात हिरोची एण्ट्री झाली असं म्हणत गेल्या वर्षी डिसेंबरमध्ये गायत्रीने चाहत्यांना आनंदाची बातमी सांगितली होती. त्यावेळी तिने होणाऱ्या जोडीदाराचा चेहरा दाखवला नव्हता. मात्र काही दिवसांनंतर तिने खास फोटो शेअर करत श्रीकांतची चाहत्यांना ओळख करून दिली.
गायत्री दातारवर सोशल मीडियावर शुभेच्छांचा वर्षाव होत आहे. 'तुला पाहते रे' या मालिकेतून तिला प्रचंड लोकप्रियता मिळाली होती. त्यानंतर ती 'अबीर गुलाल'मध्येही झळकली होती.
