दोन सख्ख्या बहिणींचा विहिरीत पडून मृत्यू, बापाने वाचवण्याचा प्रयत्न केला पण….वर्धा जिल्ह्यात हळहळ!
घटनेची माहिती मिळताच सेलू पोलिसांनी घटनास्थळी धाव घेतली. पोलिसांनी घटनास्थळाची पाहणी करून पुढील कार्यवाही सुरू केली. दोन्ही मुलींचे मृतदेह विहिरीतून बाहेर काढण्यात आले. घटनेमुळे कुटुंबीयांवर दुःखाचा डोंगर कोसळला आहे.
वर्धा जिल्ह्यात एक धक्कादायक घटना घडली आहे. येथे दोन छोट्या मुलींचा विहिरीत बुडून मृत्यू झालाय. विशेष म्हणजे आपल्या पोटच्या लेकींना वाचवण्यासाठी वडिलांनी खूप प्रयत्न केले. परंतु त्या दोन्ही मुलींचा जीव वाचू शकला नाही. या घटनेनंतर सर्वत्र हळहळ व्यक्त केली जातेय.
मिळालेल्या माहितीनुसार सेलू तालुक्यातील कोलगाव शिवारात ही दुर्दैवी घटना घडली. शेतातील विहिरीत पडून दोन सख्ख्या बहिणींचा मृत्यू झाला. मृत बहिणींचे वय 9 आणि 12 वर्षे असल्याची माहिती आहे. या घटनेने परिसरात हळहळ व्यक्त होत आहे.
घटनेच्या वेळी वडील विहिरीतून पाणी काढत होते. दोन्ही बहिणी विहिरीजवळच बाजूला खेळत होत्या. खेळत असताना अचानक दोघींचा विहिरीत तोल गेला. काही क्षणांतच दोन्ही बहिणी पाण्यात पडल्या.
मुली विहिरीत पडल्याचे लक्षात येताच वडिलांनी आरडाओरड केली. मुलींना वाचवण्यासाठी त्यांनी तातडीने विहिरीत उडी घेतली. मात्र अथक प्रयत्न करूनही दोन्ही मुलींना वाचवता आले नाही. पाण्यात बुडाल्याने दोन्ही बहिणींचा दुर्दैवी मृत्यू झाला.
घटनेची माहिती मिळताच सेलू पोलिसांनी घटनास्थळी धाव घेतली. पोलिसांनी घटनास्थळाची पाहणी करून पुढील कार्यवाही सुरू केली. दोन्ही मुलींचे मृतदेह विहिरीतून बाहेर काढण्यात आले. घटनेमुळे कुटुंबीयांवर दुःखाचा डोंगर कोसळला आहे. दोन लहान मुलींच्या मृत्यूने कोलगाव परिसरात शोककळा पसरली आहे. या प्रकरणी सेलू पोलीस पुढील तपास करत आहेत. घटनेमागील नेमकी परिस्थिती तपासानंतर स्पष्ट होणार आहे.
