Khashaba : ‘खाशाबा’ साकारणारा अभिनेता कोण? जब्या, परश्यानंतर नागराज मंजुळेंनी कोणाला निवडलं?
Khashaba : नागराज मंजुळे यांच्या 'खाशाबा' या चित्रपटाचा टीझर प्रदर्शित होताच त्यात मुख्य भूमिका कोण साकारणार, हे जाणून घेण्याची उत्सुकता प्रेक्षकांमध्ये वाढली आहे. या चित्रपटासाठी नागराज मंजुळे यांनी नव्या चेहऱ्याला पसंती दिली आहे.
दिग्दर्शक नागराज मंजुळे हे त्यांच्या चित्रपटांच्या माध्यमातून नेहमीच नव्या चेहऱ्यांना संधी देत आले आहेत. 'सैराट'मध्ये परश्याची भूमिका साकारून अभिनेता आकाश ठोसर लोकप्रिय झाला, तर 'फँड्री'मधील जब्या साकारणारा सोमनाथ अवघडेसुद्धा घराघरात पोहोचला. आता 'खाशाबा' या चित्रपटासाठीही त्यांनी नवीन चेहरा निवडला आहे.
नागराज मंजुळे दिग्दर्शित आगामी 'खाशाबा' या चित्रपटाचा टीझर प्रदर्शित होताच त्याला प्रेक्षकांनी भरभरून प्रतिसाद दिला. मात्र यामध्ये खाशाबा यांची भूमिका कोण साकारणार, याबद्दलची उत्सुकता कायम ठेवली आहे. टीझरमध्ये भूमिका दिसत असली तरी चेहरा मात्र दिसत नाही.
खाशाबा यांच्या भूमिकेसाठी ऑडिशनच्या कठोर निवड प्रक्रियेनंतर एका नव्या चेहऱ्याची निवड करण्यात आली आहे. हा नवा चेहरा कोण आहे, त्याची घोषणा लवकरच करण्यात येईल. टीझर पाहिल्यानंतर हा नवा चेहरा कोणाचा आहे, हे जाणून घेण्याची प्रेक्षकांमध्ये प्रचंड उत्सुकता निर्माण झाली आहे.
'खाशाबा' यांच्या भूमिकेसाठी या कलाकाराने प्रचंड मेहनत केल्याचं दिसून येत आहे. कुस्तीपटूच्या भूमिकेसाठी लागणारी शरीरयष्टी या टीझरमध्ये सहज पहायला मिळतेय. चित्रपटात या नवोदित कलाकारासोबत जितेंद्र जोशी, महेश मांजरेकर, गिरीश कुलकर्णी, संदीप कुलकर्णी, संदेश कुलकर्णी, सुरेश विश्वकर्मा, वैभव मांगले, छाया कदम, आणि गार्गी कुलकर्णी यांसारख्या एकापेक्षा एक दमदार कलाकारांचा सहभाग आहे.
‘खाशाबा’ हा चित्रपट स्वतंत्र भारताला पहिलं वैयक्तिक ऑलिम्पिक पदक मिळवून देणारे महाराष्ट्राचे सुपुत्र आणि दिग्गज कुस्तीपटू खाशाबा दादासाहेब जाधव यांच्या प्रेरणादायी जीवनप्रवासावर आधारित आहे.
