अभिनेत्याच्या हट्टामुळे हे गाणे सिनेमात घेतलं, प्रदर्शित होताच नकार दिलेल्या दिग्दर्शकालाही बसला शॉक
बॉलिवूडमधील गाणी ही जगभरात प्रसिद्ध आहेत. पण ही गाणी ऐकायला जितकी छान वाटतात तितकीच त्यांच्या मागची कथा रंजक आहे. एक गाणे तर असे आहे ज्या अभिनेत्याच्या हट्टाखातर सिनेमात घेण्यात आले होते.
हिंदी चित्रपटसृष्टीतील काही गाण्यांची कहाणी स्वतःच एक फिल्मी कथा असते. रिलीज होण्यापूर्वी त्यांना अनेक अडचणींमधून जावे लागते, ज्याची कुणालाही कल्पना नसते. असेच एक गाणे आहे, जे आजही लाखो-करोडो लोकांच्या हृदयात बसलेले आहे. हे गाणे एकदा फिल्ममधून बाहेर पडण्याच्या बेतात आले होते. डायरेक्टरने एका झटक्यात त्याला नाकारले होते. पण नायकाने असा पवित्रा घेतला की, संपूर्ण निर्णयच बदलला गेला. आणि त्यानंतर जे घडले, त्याने त्या गाण्याला अमरत्व प्रदान केले.
तुम्हाला प्रश्न पडला असेल की आता हे गाणे कोणते आहे? हे गाणे लता मंगेशकर यांच्या आवाजातील सदाबहार गीत ‘लग जा गले’ आहे. हे तेच गाणे आहे जे ऐकताच आजही अनेकांचे पाय थबकतात आणि मन भरून येते.
१९६४ साली प्रदर्शित झालेल्या ‘वो कौन थी’ या चित्रपटातील हे गाणे राजा मेहंदी अली खान यांनी लिहिले होते आणि मदन मोहन यांनी या गाण्याला संगीत दिले होते. पण आश्चर्याची गोष्ट म्हणजे, मदन मोहन जेव्हा हे गाणे घेऊन दिग्दर्शक राज खोसला यांच्याकडे गेले, तेव्हा त्यांनी हे गाणे चित्रपटासाठी योग्य नाही म्हणून सरळ नाकारले.
दिग्दर्शकाच्या या निर्णयाने मदन मोहन नाराज झाले. त्यांनी ताबडतोब मनोज कुमार यांना फोन केला आणि संपूर्ण गाणे ऐकवले. गाणे ऐकताच मनोज कुमार त्याच्या प्रेमात पडले. त्यांनी स्पष्ट सांगितले की, “जर हे गाणे चित्रपटात नसेल तर मीही चित्रपट करणार नाही.” त्यांच्या या ठाम भूमिकेमुळे संपूर्ण टीमला पुन्हा विचार करावा लागला.
मनोज कुमार यांच्या आग्रहावर राज खोसला यांनी गाणं पुन्हा ऐकले. यावेळी त्यांना आपली चूक कळली. नंतर त्यांनी गाण्याला चित्रपटात समाविष्ट करण्यास मान्यता दिली. हाच निर्णय नंतर चित्रपटाची सर्वात मोठी ओळख बनला.
