Ajit Pawar : राष्ट्रवादी काँग्रेस पक्ष अन् चिन्ह कोणाचे? अजित पवार यांनी केला मोठा दावा

मुंबई : राज्याचे उपमुख्यमंत्री झाल्यानंतर अजित पवार यांनी मोठा दावा केला. त्यांनी राष्ट्रवादी काँग्रेस पक्षावर आपला दावा केला आहे. आगामी सर्व निवडणुका राष्ट्रवादी काँग्रेसचा चिन्हावर आम्ही लढणार आहोत. तसेच विधिमंडळातही राष्ट्रवादी काँग्रेस म्हणूनच राहणार असल्याचे अजित पवार यांनी सांगितले. यामुळे उद्धव ठाकरे यांच्याकडून ज्या पद्धतीने शिवसेना गेली, त्या पद्धतीने शरद पवार यांच्यांकडून राष्ट्रवादी काँग्रेस जाणार का? हा प्रश्न उपस्थित झाला आहे.

नरेंद्र मोदी यांना पाठिंबा

राज्याच्या मंत्रिमंडळाचा अजून विस्तार होणार आहे. त्यावेळी अजून काही जणांना संधी मिळणार आहे. सध्या देशपातळीवर अन् राज्याची परिस्थिती लक्षात घेता आम्ही विकासाला महत्व दिले पाहिजे, असे मत आमच्या सर्वच सहकाऱ्यांनी मांडले. त्यामुळे शिंदे सरकारमध्ये सहभागी होण्याचे निर्णय घेतला. पंतप्रधान नरेंद्र मोदी देशाचा विकास करत आहेत. आपणही त्यास पाठिंबा दिला पाहिजे, असे मत आमचे सर्वच सहकाऱ्यांनी व्यक्त केले, असे अजित पवार यांनी सांगितले.

तरुणांना संधी देणार

राष्ट्रवादी काँग्रेस पक्ष वाढवण्यासाठी गेले 24 वर्षांपासून छगन भुजबळ, प्रफुल्ल पटेल किंवा सगळ्यांनीच शरद पवार यांच्या नेतृत्वात काम करत महत्त्वाची भूमिका निभावली आहे. आगामी काळात तरुणांना संधी देण्याची जास्त आवश्यकता आहे. त्या संदर्भात वेगवेगळे व्हिजन आहे. त्या व्हिजननुसार नवे कार्यकर्ते पुढे आणले गेले पाहिजेत. त्यासाठी आमचा प्रयत्न असणार आहे. मी मागे अडीच वर्षे सरकारमध्ये काम करत असताना आम्ही सगळ्यांनी विकासाचा विचार करुन पुढे जाण्याचा प्रयत्न केला, असे अजित पवार यांनी सांगितले.

सोबत कोण आहेत

आज काही जण पोहोचू शकले नाहीत. काहीजण परदेशात आहे. विशेषत: मी लोकप्रतिनिधींविषयी बोलतो. त्यांच्याशी मी संपर्क साधलाय. त्यांनी मान्यता दिली आहे. काही जण आज संध्याकाळपर्यंत पोहोचतील. अशा पद्धतीने आम्ही हा निर्णय घेतलेला आहे, असे अजित पवार यांनी सांगितले.