मुंबई महापालिकेत मनसे, शिंदे गट युती होणार?, अमित ठाकरे म्हणतात…

मुंबई :  महापालिका निवडणूक अवघ्या काही दिवसांवर येऊन ठेपली आहे. जवळपास सर्वच राजकीय पक्षाकडून निवडणुकीच्या तायारीला सुरुवात झाली आहे.  यंदा राज्यात  ज्या काही राजकीय घडामोडी घडल्या त्यामुळे मुंबई महापालिकेची निवडणूक अटीतटीची होऊ शकते असा अंदाज बांधला जात आहे.  या सर्वांमध्ये प्रमुख्याने एका मुद्द्यावर सध्या सर्वाधिक चर्चा होत आहे. ती म्हणजे मुंबई महापालिकेसाठी मनसे (MNS) आणि शिंदे गट युती करणार का? याबाबत मनसे नेते अमित ठाकरे (Amit Thackeray) यांना विचारले असता युतीबाबतचा अंतिम निर्णय हा राज ठाकरे (Raj Thackeray) यांचा असेल असं त्यांनी म्हटलं आहे.  काही दिवसांपासून मनसे आणि शिंदे गटातील नेत्यांच्या भेटीगाठी वाढल्याने युतीच्या चर्चेला उधाण आले आहे.

राज ठाकरे, शिंदे भेट

काही दिवसांपूर्वीच मुख्यमंत्री एकनाथ शिंदे यांनी राज ठाकरे यांची भेट घेतली होती. एकनाथ शिंदे यांनी राज ठाकरे यांच्या घरी जाऊन बाप्पाचे दर्शन घेतले होते. तेव्हापासून महापालिकेच्या निवडणुकीसाठी मनसे आणि शिंदे गटाची युती होणार असल्याची चर्चा सुरू आहे. मात्र ही राजकीय भेट नव्हती असं तेव्हा मुख्यमंत्री एकनाथ शिंदे यांनी म्हटलं होतं.

दरम्यान त्यानंतर मनसे नेते संदीप देशपांडे यांनी देखील मुख्यमंत्री एकनाथ शिंदे यांची भेट घेतली आहे. मनसे नेते आणि शिंदे गटातील नेते यांच्या वाढत्या भेटीगाठी पहाता युतीचा अंदाज वर्तवला जात आहे. याबाबत अमित ठाकरे यांना विचारले असता त्याबाबत राज ठाकरे हेच निर्णय घेतील असं अमित ठाकरे यांनी म्हटलं आहे.

राज ठाकरेंनी बोलावली बैठक

दरम्यान दुसरीकडे राज ठाकरे यांनी मनसे नेते आणि सरचिटणीसांची एक महत्त्वापूर्ण बैठक बैठक बोलावली आहे. येत्या 12 सप्टेंबरला सकाळी 11 वाजता मुंबईत ही बैठक पार पडणार आहे. राज ठाकरे हे 18 सप्टेंबरपासून विदर्भ दौऱ्यावर आहेत. विदर्भ दौऱ्यापूर्वी राज ठाकरे यांनी ही बैठक बोलावली आहे. महापालिका निवडणुकीच्या पार्श्वभूमीवर ही बैठक बोलावली असावी असा अंदाज बांधला जात आहे.