“केसरकर, आमच्याकडे ड्रायव्हरची जागा रिकामी, नोकरी हवी असेल तर अर्ज करु शकता!”, निलेश राणेंची दीपक केसरकरांना ऑफर

मुंबई : नारायण राणे आणि दीपक केसरकर यांच्यातील वाद आता आणखी चिघळण्याची शक्यता आहे. नारायण राणे यांचे पुत्र निलेश राणे (Nilesh Rane) यांनी आक्रमक भूमिका घेतली आहे. “दीपक केसरकर म्हणतो मी राणेंबरोबर काम करायला तयार आहे, नोकरी मागायची आहे तर नीट मागा, 1 तारखेपासून आमच्याकडे ड्रायव्हरची जागा रिकामी आहे!”, असं ट्विट करत निलेश राणेंनी केसरकरांवर शाब्दिक हल्ला केलाय. दीपक केसरकर (Deepak Kesarkar) यांनी घेतलेल्या पत्रकार परिषदेत नारायण राणेंवर थेट आरोप केले होते. सुशांतसिंह राजपूत प्रकरणात आदित्य ठाकरेंची बदनामी करण्यात आली. नारायण राणेंच्या कुटुंबाकडून आदित्य ठाकरेंच्या बदनामीचा प्रयत्न झाला, असं त्यांनी म्हटलं. त्यावर आता विविध स्तरातून प्रतिक्रिया उमटत आहे. निलेश राणेंनी तर आक्रमक शैलीत त्यांना प्रत्युत्तर दिलंय.

निलेश राणेंचं ट्विट काय?

नारायण राणे यांचे पुत्र निलेश राणे यांनी आक्रमक भूमिका घेतली आहे. “दीपक केसरकर म्हणतो मी राणेंबरोबर काम करायला तयार आहे, नोकरी मागायची आहे तर नीट मागा, 1 तारखेपासून आमच्याकडे ड्रायव्हरची जागा रिकामी आहे!”, असं ट्विट करत निलेश राणेंनी केसरकरांवर शाब्दिक हल्ला केलाय.

दिपक केसरकर म्हणतो मी राणेंबरोबर काम करायला तयार आहे, नोकरी मागायची आहे तर नीट मागा, १ तारखे पासून आमच्याकडे ड्रायव्हर ची जागा रिकामी आहे.

— Nilesh N Rane (@meNeeleshNRane) August 7, 2022

केसरकरांची राणेंवर काय टीका?

दीपक केसरकर यांनी घेतलेल्या पत्रकार परिषदेत नारायण राणेंवर थेट आरोप केले. सुशांतसिंह राजपूत प्रकरणात आदित्य ठाकरेंची बदनामी करण्यात आली. नारायण राणेंच्या कुटुंबाकडून आदित्य ठाकरेंच्या बदनामीचा प्रयत्न झाला. नारायण राणेंच्या पत्रकार परिषदेत याचा वाटा फार मोठा होता. ठाकरे कुटुंबावर प्रेम करणारे लोक यामुळे दुखावले गेले. उद्धव साहेब आणि पंतप्रधान नरेंद्र मोदींची भेट झाली. त्यानंतर कुटुंब प्रमुख कसा असावा हे नरेंद्र मोदींनी दाखवून दिलं, असं वक्तव्य दीपक केसरकरांनी केलं.

तेलींकडून इशारा

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या नेतृत्वात आणि नव्या निर्णयांमुळे राज्यातील जनता खुश आहे. दीपक केसरकरांनी उगाच भाजप नेत्यांनी काय करावं, असे सल्ले देऊ नये. मुख्यमंत्री साहेबांनी दीपक केसरकरांना आवरावं, अशी विनंती भाजप नेते राजन तेली यांनी केली आहे. सिंधुदुर्ग जिल्ह्यातील राजन तेली हे नारायण राणे यांचे कट्टर समर्थक म्हणून ओळखले जातात.