शिवसेना आमदाराचा प्रश्न, मुख्यमंत्री उद्धव ठाकरे यांचं विधिमंडळात पहिलं उत्तर

नागपूर : शिवसेना, काँग्रेस आणि राष्ट्रवादी यांचं महाविकास आघाडी सरकार स्थापन झाल्यानंतर पहिलंच अधिवेशन होत आहे. नागपुरात होत असलेल्या सहादिवसीय हिवाळी अधिवेशनात मुख्यमंत्री उद्धव ठाकरे यांनी विधानपरिषदेत आमदाराने उपस्थित केलेल्या लक्षवेधीला उत्तर दिलं. उद्धव ठाकरे यांचं हे विधिमंडळातील पहिलंच उत्तर (CM Uddhav Thackeray in Vidhan Parishad) ठरलं आहे.

शिवसेना आमदार गोपीकिशन बाजोरिया यांनी अकोल्यातील शिवणी विमानतळाच्या विस्तारीत धावपट्टीचा मुद्दा सदनात मांडला. विमानतळासंबंधीचा हा प्रश्न अनेक वर्षांपासून प्रलंबित असल्याचं बाजोरिया यांनी सांगितलं. गोपीकिशन बाजोरिया हे अकोला-वाशिम-बुलडाणा मतदारसंघातून शिवसेनेचे विधानपरिषदेवरील आमदार आहेत.

‘शिवणीमधील विमानतळच्या विस्तारित धावपट्टीच्या प्रश्नाबाबत मी माहिती घेतली आहे. मी माझ्या दालनात बैठक घेतो आणि या प्रश्नावर मार्ग काढतो’, असं उत्तर मुख्यमंत्री उद्धव ठाकरे यांनी दिलं. आता, शिवणीतील विस्तारीत धावपट्टीच्या  प्रश्नावर ठाकरे सरकार काय तोडगा काढणार, याकडे अकोलावासियांचं लक्ष लागलं आहे.

भाजप आमदार नागपुरात संघाच्या ‘शाळे’त, नितेश राणे, विखे, गणेश नाईकही हजर

हिवाळी अधिवेशनाचा आज तिसरा दिवस आहे. सोमवारी सावकरांच्या मुद्द्यावर पहिला दिवस विरोधकांनी गाजवला होता. त्यानंतर काल शेतकरी कर्जमाफीसह इतर मुद्द्यांवर विरोधकांनी गोंधळ घातल्याने कामकाज तहकूब झालं. भाजपने विधान भवन परिसरात शेतकऱ्यांच्या मुद्द्यांवरुन जोरदार घोषणाबाजी केली.

दरम्यान, राष्ट्रवादीचे सर्वेसर्वा शरद पवार आज आमदारांशी संवाद साधणार आहेत. शरद पवार यांच्या नागपुरातील ‘देवगिरी’ निवासस्थानी ते आमदारांशी संवाद साधणार आहेत. भाजप आक्रमक झाल्याने आता पवार आपली खेळी खेळणार आहेत. ते आज केवळ राष्ट्रवादीच्या आमदारांशी संवाद साधून नेमकी काय रणनीती आखणार हे पाहणं महत्त्वाचं ठरणार आहे.

CM Uddhav Thackeray in Vidhan Parishad