Gunratna Sadavarte : छटपुजेवरुन वातावरण तापलं, गुणरत्न सदावर्तेंचं ठाकरे बंधूना थेट चॅलेंज, म्हणाले, ‘येऊनच दाखवा….’

ठाकरे बंधूंना गुणरत्न सदावर्तेंचं थेट चॅलेंज

छटपूजेवरून महाराष्ट्रातील राजकीय वातावरण तापले असतानाच गुणरत्न सदावर्ते यांनी उद्धव ठाकरे आणि राज ठाकरे यांच्यावर जोरदार टीका केली आहे. उद्धव ठाकरे आणि राज ठाकरे रसातळाला गेलेलं राजकारण करत असून, कधी कुंभमेळा तर कधी छटपूजेला विरोध करत असल्याचा आरोप सदावर्ते यांनी केला. हे बालक आहेत, यांना बालकच म्हणावं लागेल, अशा शब्दांत त्यांनी दोन्ही नेत्यांना लक्ष्य केलं. तसेच 15 आणि 16 नोव्हेंबर रोजी होणारी छटपूजा निर्विवादपणे पार पडेल, असा दावाही त्यांनी केला.

भोजपुरी गाण्यांवरून राज ठाकरेंना सुनावलं

रेल्वेमध्ये भोजपुरी गाणी का वाजवली जातात, असा प्रश्न उपस्थित करणाऱ्यांवरही सदावर्ते यांनी निशाणा साधला. उत्सवी गीतांना डान्स बारमधील गाणी म्हणणे ही सांस्कृतिक दिवाळखोरी असल्याचे ते म्हणाले. बिहारी म्हणून एखाद्याचा अपमान करणे हा संविधानासोबत द्रोह असल्याचेही त्यांनी सांगितले. बिहार विमानतळावर छटपूजेची गाणी वाजवली जातात, असा दाखलाही त्यांनी दिला.

‘राज ठाकरे, उद्धव ठाकरेंनी छटपूजा रोखून दाखवावी’

राज ठाकरे, उद्धव ठाकरे आणि हुसेन दलवाई यांना सदावर्ते यांनी थेट आव्हान दिले आहे. 15 तारखेला जिथे छटपूजा सुरू असेल तिथे येऊन दाखवा, असे आव्हान त्यांनी दिले. मुंबईत छटपूजा होणारच असून, राज ठाकरे यांच्या दोन-पाच कार्यकर्त्यांमुळे पूजा थांबणार नाही, असेही ते म्हणाले. पूजेसाठी मोठ्या संख्येने लोक येतील आणि विरोध करणारे तिथून पळून जातील, असा दावाही त्यांनी केला.

राज ठाकरे आणि त्यांच्या कार्यकर्त्यांविरोधात पोलिसांत तक्रार

छटपूजेला विरोध करणाऱ्यांविरोधात आपण पोलिसांत तक्रार दाखल केल्याचे सदावर्ते यांनी सांगितले. राज ठाकरे आणि त्यांच्या कार्यकर्त्यांवर तातडीने कारवाई करण्यात यावी, अशी मागणी त्यांनी केली आहे. छटपूजा हा हिंदू सण असून, या पूजेच्या आड येणाऱ्यांना कायदेशीर मार्गाने उत्तर दिले जाईल, असा इशाराही त्यांनी दिला.

दरम्यान, कलकत्ता न्यायालयाने छटपूजेला परवानगी दिल्याचा उल्लेख करत महाराष्ट्र सरकारनेही पूजेला परवानगी द्यावी, अशी विनंती सदावर्ते यांनी केली. ‘काश्मीर ते कन्याकुमारी हा एकच देश आहे. हा पाकिस्तान किंवा बांगलादेश नाही’, असे म्हणत त्यांनी देशातील सर्वांना धार्मिक स्वातंत्र्य असल्याचे सांगितले.

‘राज ठाकरे यांनी आता एखादी ग्रामपंचायतीची निवडणूक पाहावी. छटपूजा कोणत्याही परिस्थितीत थांबणार नाही’, अशा शब्दांत गुणरत्न सदावर्ते यांनी आपली भूमिका स्पष्ट केली.