देशात लवकरच लोकसभा निवडणुकीचा दुसरा टप्पा पार पडणार आहे. दुसऱ्या टप्प्याच्या प्रचारात हनुमान चालीसापासून आरक्षणाचा मुद्दा गाजत आहे. या सगळ्यामध्ये अजून एक शब्द ट्रेंड होतोय, तो म्हणदे सूरत. लोकसभा निवडणुकीत गुजरातच्या सूरतमधून भाजपाच्या विजयाचा श्रीगणेशा झाला आहे. भाजपाचे उमेदवार मुकेश दलाल यांनी मतदानाआधीच बिनविरोध निवडणूक जिंकली आहे. काँग्रेस उमेदवाराचा अर्ज बाद झाल्यामुळे हे शक्य झालय. सूरतमधून भाजपा उमेदवार मुकेश दलाल यांच्या विजयाची घोषणा करण्यात आली आहे. इथे भाजपाचा सामना काँग्रेस बरोबर होता. काँग्रेस उमेदवाराचा अर्ज बाद झाला. त्यानंतर इतक्या वेगाने घडामोडी घडल्या की, 24 तासात सूरतमधील चित्र बदललं. मतदानाआधीच भाजपा उमेदवाराच्या विजयामुळे देशात राजकीय गदारोळ सुरु आहे. विरोधी पक्ष सरकारवर प्रश्नचिन्ह निर्माण करतोय.
सूरतमधील भाजपा उमेदवाराच्या बिनविरोध विजयानंतर अनेक प्रश्न निर्माण झाले आहेत. काँग्रेस उमेदवार नीलेश कुंभाणी यांनी भाजपाशी हातमिळवणी केली होती का? नीलेश कुंभाणी यांनी आपल्या पक्षाला अंधारात ठेवलं का? नामांकन मागे घेण्याच्या शेवटच्या दिवशी 8 उमेदवारांनी अचानक माघार का घेतली? या सर्व उमेदवारांच आधी ठरलं होतं का? की हे प्रकरणच वेगळं आहे असे विविध तर्क-वितर्क, अंदाज लावले जात आहेत. भाजपाच्या या पहिल्या विजयामागची गोष्ट वेगळी आहे. ही स्क्रिप्ट आधीच लिहीली होती, अशी राजकीय वर्तुळात चर्चा आहे.
आधीपासून भाजपाशी सेटिंग केली होती का?
20 एप्रिलला सूरतमधील काँग्रेस उमेदवार नीलेश कुंभाणी यांच्या उमेदवारी अर्जामध्ये साक्षीदारांच्या सहीमध्ये गडबड असल्याची तक्रार मिळाली. जिल्हा निवडणूक अधिकाऱ्याने या प्रकरणी कुंभाणी यांना 22 एप्रिल सकाळी 11 वाजेपर्यंत उत्तर द्यायला सांगितलं. 21 एप्रिलला कलेक्टर आणि निवडणूक अधिकाऱ्या समक्ष सुनावणी झाली. त्यावेळी सही करणारे चारही साक्षीदार गायब होते. 22 एप्रिलला भाजपा उमेदवार मुकेश दलाल यांची बिनविरोध निवड झाली. भाजपाच्या विजयासाठी काँग्रेस उमेदवाराने आधीपासून भाजपाशी सेटिंग केली होती, असा आरोप आता होतोय.
अशा प्रकरे काँग्रेसचा चॅप्टर क्लोज
पक्षाचे कार्यकर्ते कुंभाणीचे प्रस्तावक नव्हते. नीलेश कुंभाणीने नातेवाईक जगदीया सावलियाला प्रस्तावक बनवलं होतं. त्याशिवाय बिजनेस पार्टनर ध्रुविन धामेलिया आणि रमेश पोलरा प्रस्तावक होते. फॉर्म भरताना यापैकी एकालाही निवडणूक अधिकाऱ्यासमोर आणलं नाही. त्यानंतर याच प्रस्तावकांनी बनावट स्वाक्षरीच प्रतिज्ञापत्र दिलं आणि अंडरग्राऊंड झाले. नोटीस मिळाल्यानंतरही कोणी समोर आलं नाही. अशा प्रकरे काँग्रेसचा चॅप्टर क्लोज झाला.
गुजरात पोलिसांची क्राइम ब्रांच एक्टिव
काँग्रेस उमेदवाराचा अर्ज बाद झाल्यानंतर बीएसपी आणि अन्य छोट्या पक्षांचे आठ उमेदवार रिंगणात होते. त्यानंतर सूरतच्या फाईव्ह स्टार हॉटेलमध्ये घडामोडी घडल्या. अशी चर्चा आहे की, बीएसपी उमेदवार सूरतहून वडोदऱ्याला गेले होते. त्यांना शोधण्यासाठी गुजरात पोलिसांची क्राइम ब्रांच एक्टिव झाली. क्राइम ब्रांचच बीएसपी उमेदवाराला वडोदऱ्यावरुन सूरतच्या फाईव्ह स्टार हॉटेलमध्ये घेऊन आल्याच बोललं जातय.
1984 पासून सूरतची जागा कोण जिंकतय?
फोन करुन चारही अपक्ष उमेदवारांना हॉटेलमध्ये बोलवून घेण्यात आलं. त्यांना समोरा-समोर बसवलं. त्यानंतर हे उमेदवार अर्ज मागे घ्यायला तयार झाले. सोमवारी चार वेगवेगळ्या पक्षाच्या उमेदवारांनी आपला अर्ज मागे घेतला. अशा प्रकारे भाजपाच्या बिनविरोध निवडीचा मार्ग मोकळा झाला. गुजरातमध्ये पहिल्यांदा लोकसभा निवडणुकीत एखाद्या उमेदवाराची बिनविरोध निवड झाली आहे. 1984 पासून सूरत लोकसभेची जागा भाजपाने जिंकली आहे.