Aditi Tatkare PRO: धक्कादायक! आदिती तटकरे यांच्या पीआरओचा अचानक मृत्यू; नेमकं काय घडलं?
Aditi Tatkare PRO: एक धक्कादायक माहिती समोर येत आहे. मंत्री आदिती तटकरे यांचे पीआरओ म्हणून काम करत असलेल्या आशिष मेटे नावाच्या तरुणाचा मृत्यू झाला आहे. त्याच्या निधनाचे कारण अद्याप समोर आलेले नाही.
मंत्री अदिती तटकरे यांच्याकडे पीआरओ म्हणून काम करणाऱ्या तरुणाचा अचानक मृत्यू झाल्याची घटना समोर आली आहे. मृताचे नाव आशिष मेटे असे आहे. भांडूप येथील इमारतीच्या आवारात फिरत असताना अचानक तरुण खाली कोसळला आणि त्याचा डोक्याला जोरात मार लागला. त्यानंतर तरुणाचा मृत्यू झाला. या प्रकरणी भांडूप पोलिसांनी आकस्मिक मृत्यूची नोंद करून तपासाला सुरुवात केली आहे.
नेमकं काय घडलं?
समोर आलेल्या माहितीनुसार, आशिष मेटे हे जेवण झाल्यानंतर इमारतीच्या आवारात चालत होते. चालताचालता ते अचानक कोसळले. जमिनीवर कोसळल्यामुळे त्यांच्या डोक्याला जोरदार मार लागला. परिसरातील लोकांनी त्यांना तात्काळ रुग्णालयात दाखल केले. मात्र रुग्णालयात पोहोचल्यानंतर डॉक्टरांनी तपासणी करून त्यांना मृत घोषित केले.
कोण आहेत आशिष मेटे?
आशिष मेटे हे मंत्री अदिती तटकरे यांच्यासोबत थेट सरकारी सेवेत नसून एका पब्लिक रिलेशन कंपनीच्या माध्यमातून बाह्य यंत्रणेद्वारे पीआरओ म्हणून काम पाहत होते. मंत्र्यांच्या कार्यालयाशी संबंधित प्रसिद्धी आणि जनसंपर्क विषयक कामे ते हाताळत होते, अशी माहिती समोर आली आहे. या दुर्घटनेची बातमी समोर आल्यानंतर भांडूप पोलिस स्टेशनमध्ये आकस्मिक मृत्यूची नोंद करण्यात आली आहे. पोलिसांनी घटनास्थळी पोहोचून प्राथमिक चौकशी सुरू केली आहे. तसेच आशिष मेटे यांचे शव पोस्टमॉर्टम करण्यासाठी पाठवण्यात आले आहे. त्या अहवालाच्या आधारे पुढील तपास दिशा ठरेल.
आशिष मेटे यांचे कुटुंबीय या अचानक झालेल्या मृत्यूने शोकाकुल झाले आहेत. परिसरातील लोकांनीही या घटनेबाबत दुःख व्यक्त केले आहे. पोलिसांनी सांगितले की, सध्या कोणतीही संशयास्पद बाब समोर आलेली नाही. तरीही सर्व बाजूंनी तपास सुरू असून घटनाक्रम आणि मृत्यूचे नेमके कारण अद्याप स्पष्ट झालेले नाही.
