‘…तर ओबीसी आरक्षण रद्द होईल’, मनोज जरांगे पाटील यांचं मोठं वक्तव्य

लातूर | 9 डिसेंबर 2023 : राष्ट्रवादी काँग्रेसचे नेते छगन भुजबळ यांनी आज इंदापूर येथे ओबीसी एल्गार सभेत मराठा समाजाचे नेते मनोज जरांगे पाटील यांच्यावर सडकून टीका केली. त्यांच्या टीकेला आता मनोज जरांगे पाटील यांनी उत्तर दिलं आहे. यावेळी त्यांनी ओबीसी समाजाच्या आरक्षणाबाबत एक महत्त्वाचं वक्तव्य केलं. “माझी पुन्हा एकदा अजित पवार यांना विनंती आहे की, तुम्ही त्यांना समज द्या. आम्ही त्यांच्याविरोधात बोलायचं बंद केलं आहे. त्यांचं नाव घेणं बंद केलं आहे. नाहीतर मग मी पुन्हा सुरु करेन. आम्ही दिवसरात्र कार्यक्रम घेत असलो तरी सरकार आणि प्रशासनाचं जे काम आहे, शांतता राखणं ते काम आम्ही जनता म्हणून करतोय”, असं मनोज जरांगे पाटील म्हणाले.

“छगन भुजबळ म्हणतील तसा कायदा चालत नसतो. शासकीय नोंदी रद्द होत नसतात. कुणबी नोंदी रद्द केल्या तर ओबीसींचं सगळं आरक्षण रद्द होईल. देशातील सर्व ओबीसींचं आरक्षण रद्द करावं लागेल. आमचे पुरावे असून रद्द होत असतील तर त्यांचं आरक्षण तर कशाच्याच आधारावर दिलेलं नाही. जात म्हणून दिलेलं आरक्षण आणि व्यवसाय म्हणून दिलेलं आरक्षण मग राहत नसतं. आमचे तर पुरावे आहेत. पण तसं होत नसतं. कायदा कायद्याच्या जागेवर असतो”, अशी प्रतिक्रिया मनोज जरांगे पाटील यांनी दिली.

‘…तर एकाच दिवशी सगळं ओबीसी आरक्षण रद्द होईल’

“छगन भुजबळ मंत्री झाले आहेत. ते मंत्रीपदाचा गैरवापर करत आहेत. गोरगरीबांवर केस करायला लावतो, त्यांच्या हॉटेल जाळून गोरगरीबांची लेकरं गुंतवत आहे. त्यांना वाटतं की, मी पदावर बसलो आहे. बोललो तर होईल. पण दिलेले प्रमाणपत्र हे आधीचे असो किंवा आताचे असो, ते रद्द होत नाहीत. कारण ते शासकीय नोंदी आहेत. तसं जर झालं तर ओबीसीचं सगळं आरक्षण एकाच दिवशी रद्द होऊ शकतं. कुणाचाच राहू शकत नाही. पण ते म्हणतील तसं होणार नाही”, असं मनोज जरांगे म्हणाले.

“या अधिवेशनातच मराठा समाजाच्या आरक्षणासाठी कायदा पारित होईल. शंभर टक्के, त्यांनी 24 डिसेंबरपर्यंत वेळ घेतला आहे. नाही झाली तर आम्ही लढायला सज्ज आहोत. मराठा समाजाच्या शासकीय नोंदी मिळाल्या आहेत”, असं मनोज जरांगे म्हणाले.

जरांगेंची भुजबळांवर टीका

“छगन भुजबळ प्रत्येक जागेवर जावून जातीय तेढ निर्माण होईल, अशी वक्तव्ये करत आहेत. दंगली भडकतील, ओबीसी आणि मराठा समाजात वाद होईल, असे वक्तव्ये करत आहेत. आम्ही गाव खेड्यातले गोरगरीब मराठे आणि गोरगरीब ओबीसी बांधव आम्ही आजही एकमेकांवर प्रेम करतो, एकमेकांच्या सुख-दु:खात जातो. यांचं स्वप्न आहे, यांना दंगल घडवायची आहे आणि राजकीय फायदा उचलायता आहे. मी गावागावात जावून मराठा बांधवांना आवाहन करतोय. आरक्षण मिळेपर्यंत शांत राहा कारण आपल्याला जातीय तेढ निर्माण करायचा नाही. जे काम प्रशासन करतंय तेच काम आम्ही शांततेचं काम करतोय”, असं मनोज जरांगे म्हणाले.