क्लीन चिट मिळाल्यानंतर संजय शिरसाट यांची पहिली प्रतिक्रिया; म्हणाले…

मुंबई : शिवसेनेचे नेते, आमदार संजय शिरसाठ यांना पोलिसांकडून क्लीन चिट देण्यात आली आहे. शिवसेनेच्या उपनेत्या सुषमा अंधारे यांनी संजय शिरसाट यांच्यावर गंभीर आरोप केले होते. या प्रकरणी छत्रपती संभाजीनगर पोलिसांनी संजय शिरसाट यांना क्लीन चिट दिली आहे. ही क्लीन चिट मिळाल्यानंतर संजय शिरसाट यांनी पहिली प्रतिक्रिया दिली आहे.

मी कुणाचंही नाव घेतलं नाही. तुम्ही कुटाने केले. काही लोकांना प्रसिद्धी हवी असते. त्यानुसार ते वागतात. त्या व्हीडिओत अश्लील काय बोललो ते सांगा. जर कुठे त्या व्हीडिओत अश्लील दिसलं असतं तर मी राजकारण सोडलं असतं, असं संजय शिरसाट म्हणाले आहेत. लढाई लढावी लागते. केलेल्या आरोपांसाठी लढेन. मी बेबाक बोलतो, सडेतोड बोलतो. पण हा माणूस जे बोलला ते सत्य बोलतो, असंही शिरसाट यांनी म्हटलं आहे.

मंत्रिमंडळ विस्तारावर काय म्हणाले?

मंत्रिमंडळ विस्तारावरही संजय शिरसाट यांनी प्रतिक्रिया दिली आहे. मंत्रिमंडळ विस्तार होणारच आहे. पण कधी होणार याचं नेमकं उत्तर मी देऊ शकत नाही. अधिवेशनापूर्वी कॅबिनेट विस्तार होईल, असं वाटतं. मी माझ्या कामात व्यस्त आहे, दे तो भला, ना दे तो भी भला, असं संजय शिरसाट यांनी म्हटलं आहे.

विनायक राऊत यांच्या बोलण्याला बेस काय आहे? हे फक्त वावड्या ऊठवतात. त्यांच्या नाही ठाकरे गटाचे लोक आमच्या संपर्कात आहेत. संजय राऊत आणि कंपनीची कार्यपद्धती पाहा. संजय राऊत पक्ष प्रमुखाच्या अविर्भावात आहेत, असा घणाघात संजय शिरसाट यांनी केला आहे.

संजय राऊत यांच्या अडचणी वाढणार आहेत. सगळी हवा निघणार आहे. खोल समुद्रातील गेल्यावर जशी अवस्था होते, तशी अवस्था संजय राऊत यांची होईल. संजय राऊतांच्या डोक्यावर परिणाम झालाय. कुत्र्या-मांजराची भाषा ही सामना संपादकाला शोभणारी आहे का? संजय राऊत आमच्या कृपेने खासदार झालेत. त्यांची लायकी काय आहे. आम्ही माणसं फोडली पण संजय राऊत यांनी ढेकुण तरी मारलाय का? संजय राऊत यांच्यात राजकिय परिपक्वता आहे का ? त्यांचा राजकीय कार्यकाळ आता संपलाय, असं म्हणत शिरसाट यांनी संजय राऊत यांच्यावरही टीकास्त्र डागलंय.