धनत्रयोदशीला राहुकाळाचे सावट, 1 तास 25 मिनिटे चुकूनही करू नका खरेदी! जाणून घ्या शुभ मुहूर्त
Dhantrayodashi 2026: धनत्रयोदशीचा सण खरेदी, आनंद, समृद्धी आणि संपत्तीशी संबंधित आहे. या दिवशी सोने, चांदी, भांडी आणि नवीन वस्तू खरेदी करण्याची परंपरा आहे. मात्र धनत्रयोदशीच्या दिवशी राहूकाळाकडे विशेष लक्ष दिले पाहिजे.
हिंदू धर्मात धनत्रयोदशीचा सण अत्यंत शुभ आणि महत्त्वाचा मानला जातो. दरवर्षी कार्तिक महिन्यातील कृष्ण पक्षातील त्रयोदशी तिथीला धनत्रयोदशी साजरी केली जाते. या दिवशी भगवान धन्वंतरी, देवी लक्ष्मी आणि कुबेर देवाची पूजा-अर्चना केली जाते. धार्मिक मान्यतेनुसार, समुद्र मंथनाच्या वेळी याच दिवशी भगवान धन्वंतरी अमृत कलश घेऊन प्रकट झाले होते. त्यामुळे धनत्रयोदशी हा सण धन, आरोग्य आणि सुख-समृद्धीचे प्रतीक मानला जातो. या दिवशी लोक सोने-चांदी, भांडी, वाहने आणि घरासाठी नवीन वस्तूंची खरेदी करतात. तसेच, संध्याकाळी घराबाहेर यमदीप प्रज्वलित करण्याचीही परंपरा आहे.
धनत्रयोदशीला राहुकाळ कधी असणार?
मुंबईच्या वेळेनुसार, 6 नोव्हेंबर 2026 रोजी धनत्रयोदशीच्या दिवशी सकाळी 10 वाजून 57 मिनिटांपासून दुपारी 12 वाजून 22 मिनिटांपर्यंत राहुकाळ असणार आहे. म्हणजेच जवळपास 1 तास 25 मिनिटे राहुकाळ असेल. ज्योतिषशास्त्रीय मान्यतेनुसार, या काळात कोणत्याही नवीन किंवा शुभ कामाची सुरुवात करणे टाळावे. या वेळेत सुरू केलेल्या कामांमध्ये अडथळे किंवा विलंब येऊ शकतो.
नवीन व्यवसाय सुरू करू नका
राहुकाळात नवीन व्यवसाय सुरू करणे, दुकान उघडणे किंवा नवीन कार्यालयाचे उद्घाटन करणे टाळावे. या काळात सुरू केलेल्या कामांमध्ये अडथळे येऊ शकतात, अशी मान्यता आहे.
शुभ कार्ये टाळा
या वेळेत विवाह, साखरपुडा, गृहप्रवेश, मुंज, नामकरण आणि यज्ञ-हवन यांसारख्या शुभ कार्यांची सुरुवात करू नये.
नवीन प्रवास सुरू करू नका
राहुकाळात महत्त्वाच्या किंवा नवीन प्रवासाची सुरुवात करणे टाळावे. विशेषतः शुभ कारणासाठी प्रवास करायचा असल्यास दुसरी वेळ निवडावी.
सोने-चांदीची खरेदी टाळा
राहुकाळात सोने-चांदी, वाहने, घर, मोबाइल, टीव्ही आणि इतर महागड्या वस्तूंची खरेदी करणे टाळण्याची परंपरा आहे.
पैशांचे व्यवहार करू नका
या काळात मोठ्या रकमेचे कर्ज देणे किंवा घेणे तसेच महत्त्वाचे आर्थिक करार करणे टाळावे. त्याचबरोबर करारपत्रे आणि आवश्यक कागदपत्रांवर स्वाक्षरी करणेही टाळावे.
करिअरविषयी मोठे निर्णय घेऊ नका
नोकरीची मुलाखत, महाविद्यालयातील प्रवेश किंवा करिअरशी संबंधित महत्त्वाचे निर्णय घेण्यासाठी राहुकाळाची वेळ योग्य मानली जात नाही.
धनत्रयोदशीला खरेदीसाठी शुभ चौघडिया मुहूर्त
धनत्रयोदशीच्या दिवशी सोने-चांदी, भांडी आणि इतर नवीन वस्तूंच्या खरेदीसाठी शुभ चौघडिया मुहूर्ताला महत्त्व दिले जाते. मुंबईच्या वेळेनुसार शुभ मुहूर्त पुढीलप्रमाणे आहेत.
• लाभ चौघडिया: सकाळी 8.06 ते 9.32
• अमृत चौघडिया: सकाळी 9.32 ते 10.57
• शुभ चौघडिया: दुपारी 12.22 ते 1.47
• चर चौघडिया: संध्याकाळी 4.38 ते 6.03
• लाभ चौघडिया: रात्री 9.13 ते 10.47
धनत्रयोदशी पूजा शुभ मुहूर्त
• धनत्रयोदशी पूजा मुहूर्त: संध्याकाळी 6.35 ते रात्री 8.35
• प्रदोष काळ: संध्याकाळी 6.03 ते रात्री 8.35
• वृषभ काळ (स्थिर लग्न): संध्याकाळी 6.35 ते रात्री 8.35
• यमदीपदानाची वेळ: संध्याकाळी 6.03 ते 7.19
(डिस्क्लेमर : वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल आम्ही कुठलाही दावा करीत नाही, तसेच अंधश्रद्धेला दुजोरा देत नाही)
