Mirabai Chanu: सुवर्णपदक हुकलं पण तरीही वाघिणीने इतिहास रचला, मीराबाई चानूचा ऐतिहासिक पराक्रम

भारताची स्टार वेटलिफ्टर मीराबाई चानूने बुधवारी येथे महिलांच्या ४९ किलो वजनी गटात रौप्य पदक जिंकून आशियाई क्रीडा स्पर्धेतील आपल्या पदकाची प्रदीर्घ प्रतीक्षा संपवली. टोकियो ऑलिम्पिक रौप्य पदक विजेत्या मीराबाई चानूने स्नॅचमध्ये ८८ किलो आणि क्लीन अँड जर्कमध्ये १११ किलो असे एकूण १९८ किलो वजन उचलले. भारताने २८ वर्षांनंतर वेटलिफ्टिंगमध्ये पदक जिंकले आहे. यापूर्वी १९९८ मध्ये कर्णम मल्लेश्वरीने कांस्य पदक जिंकले होते. आता मीराबाई चानूने रौप्य पदक पटकावले आहे.

मीराबाईने यापूर्वी ऑलिम्पिक आणि जागतिक चॅम्पियनशिपमध्ये पदके जिंकली आहेत, परंतु आशियाई क्रीडा स्पर्धेत तिने ही कामगिरी केली नव्हती. मीराबाईने ऑलिम्पिकमधील रौप्य पदक, जागतिक चॅम्पियनशिपमधील सुवर्ण पदक, राष्ट्रकुल क्रीडा स्पर्धा आणि राष्ट्रकुल चॅम्पियनशिपमधील सुवर्ण पदके आणि आशियाई चॅम्पियनशिपमधील कांस्य पदकासह तीन पदके जिंकली आहेत.

उत्तर कोरियाची दोन वेळची विश्वविजेती री सॉन्ग गमने अपेक्षा पूर्ण करत एकूण २१५ किलो (९४ किलो आणि १२१ किलो) वजन उचलून सुवर्णपदक जिंकले आणि आशियाई क्रीडा स्पर्धेत विजेतेपदाची हॅटट्रिक पूर्ण केली. तिने स्नॅचमध्ये पहिल्या प्रयत्नात ९० किलो आणि दुसऱ्या प्रयत्नात ९४ किलो वजन उचलले. क्लीन अँड जर्कमध्ये तिने ११६ किलो आणि १२१ किलो वजन उचलून सुवर्णपदक जिंकले. तिने दोन्ही टप्प्यांमध्ये तिसरा प्रयत्न केला नाही, त्यामुळे त्याशिवायच सुवर्णपदक मिळवले.

मीराबाईने स्नॅचमध्ये ८३ किलोने सुरुवात केली आणि त्यानंतर पुढील दोन प्रयत्नांत ८५ किलो आणि ८७ किलो वजन उचलून स्पर्धेच्या पहिल्या टप्प्यात तिसरे स्थान पटकावले. त्यानंतर तिने क्लीन अँड जर्कमध्ये पहिल्या प्रयत्नात १०७ किलो आणि दुसऱ्या प्रयत्नात १११ किलो वजन उचलून आपले पहिले आशियाई क्रीडा पदक जिंकले. दक्षिण कोरियन खेळाडूच्या तुलनेत तिच्यात १७ किलोचे अंतर असल्यामुळे चानूने तिसरा प्रयत्न केला नाही. आघाडी घेण्यासाठी तिला तिसऱ्या प्रयत्नात किमान १२९ किलोग्रॅम वजन उचलावे लागले असते, जे अशक्य होते. तिने यापूर्वी दोनदा आशियाई क्रीडा स्पर्धेत भाग घेतला होता, पण तिला पदक जिंकता आले नव्हते.