महेंद्रसिंह धोनी काम करत असलेल्या कंपनीवर ईडीची वक्रदृष्टी! नेमकं काय झालं? जाणून घ्या

महेंद्रसिंह धोनी नोकरी करत असलेली कंपनी ईडीच्या रडारवर! कसं आणि का? ते समजून घ्या

मुंबई : भारतीय क्रिकेट संघाचा माजी कर्णधार आणि दिग्गज विकेटकीपर एमएस धोनी गेल्या काही वर्षांपासून एका कंपनीसोबत काम करत आहे. आता ही कंपनी ईडीच्या रडारवर आली आहे. सूत्रांनी दिलेल्या माहितीनुसार, इंडिया सिमेंट्स कंपनीच्या चेन्नईतील हेडक्वॉर्टरवर ईडीची टीमने छापेमारी केली आहे. विशेष म्हणजे आयपीएलमध्ये चेन्नई सुपर किंग्स संघाचे मालकी हक्क इंडिया सिमेंट्स लिमिटेड या कंपनीकडे आहे. या कंपनीचे मालक एन श्रीनिवासन असून त्यांनी यापूर्वी आंतरराष्ट्रीय क्रिकेट काउंसिल आणि भारतीय क्रिकेट नियामक मंडळाचं अध्यक्षपद भूषवलं आहे. त्याचबरोबर तामिळनाडू क्रिकेट असोशिएशनवरही त्यांचं एकछत्री अंमल राहिला आहे. पण आता ईडीच्या कारवाईमुळे क्रीडाविश्वात एकच खळबळ उडाली आहे. ईडीने फेमा ((FEMA- फॉरेन एक्सचेंज मॅनेजमेंट अॅक्ट) अंतर्गत कारवाईचा बडगा उचलला असून विदेशी पैशांच्या देवाणघेवाणीवरून संशय असल्याचं सांगण्यात येत आहे. कंपनीने एमडी एन श्रीनिवासन यांच्या घरीही ईडीची एक टीम उपस्थित आहे. त्यामुळे येत्या काही दिवसात मोठी कारवाई होण्याची शक्यता सूत्रांकडून मिळाली आहे.

इंडिया सिमेंट्सची मार्केट व्हॅल्यू जवळपास 7700 कोटी रुपये आहे. या कंपनीने 2008 मध्ये आयपीएलमध्ये चेन्नईची फ्रेंचायसी विकत घेतली होती. त्यावेळेस कंपनीने फ्रेंचायसीसाठी  9 कोटी डॉलर्सपेक्षा जास्त पैसे मोजले होते. तसेच लिलावात एमएस धोनीसाठी सर्वाधिक किंमत मोजत संघात सहभागी केलं होतं. तेव्हापासून एमएस धोनी या संघासोबत असून कर्णधार आहे. पण खऱ्या अर्थाने एमएस धोनी इंडिया सिमेंट्स कंपनीसोबत 2012 पासून जोडला गेला आहे.

चेन्नईचं कर्णधारपद यशस्वीरित्या भूषवत असताना श्रीनिवासन यांच्याशी जवळचे संबंध प्रस्थापित झाले. 2012 मध्ये इंडिया सिमेंट्समध्ये धोनीला कर्मचारी म्हणून सहभागी करण्यात आलं. धोनीला तेव्हा कंपनीत व्हाईस प्रेसिडेंट (मार्केटिंग) म्हणून नियुक्त केलं होतं. अपॉइंटमेंट लेटरनुसार, धोनीला तेव्हा 43 हजार रुपये बेसिक स्केलवर कंपनीत घेतलं होतं. तसेच वेगवेगळे भत्ते देत मासिक पगार हा 1.70 लाख रुपयांपेक्षा जास्त होता.

इंडिया सिमेंट्स कंपनीचे मालक आणि मॅनेजिंग डायरेक्टर श्रीनिवासन यांचं क्रिकेटशी फार जुनं नातं आहे. गेली अनेक वर्षे ते तामिळनाडू क्रिकेट असोसिएशनचे अध्यक्ष राहिले आहे. 2011 ते 2013 या कालावधीत त्यांच्याकडे बीसीसीआयचं अध्यक्षपद होतं. त्यानंतर आयसीसीच्या चेअरमनपदी बसले. त्यांनी हे पद 2014 ते 2015 या कालावधीत भूषवलं.