Ayush Mhatre : ये आयुष दादा, वर्ल्ड कप विनर कॅप्टनच्या ऑटोग्राफसाठी छोट्यांची गर्दी, पाहा व्हीडिओ
Ayush Mhatre Grand Welcome In Virar : आयुष म्हात्रे याच्या कर्णधारपदात ज्युनिअर टीम इंडियाने इंग्लंडला पराभूत करत इतिहास घडवला. भारताने संपूर्ण स्पर्धेत अंजिंक्य राहत आयसीसी अंडर 19 वर्ल्ड कप ट्रॉफी जिंकण्याची कामगिरी केली. त्यानंतर आता आयुषची विरारमध्ये जंगी स्वागत करुन विजयी मिरवणूक काढण्यात आली.
भारताने मराठमोळ्या आयुष म्हात्रे याच्या नेतृत्वात इंग्लंडला पराभूत करुन अंडर 19 वर्ल्ड कप ट्रॉफीवर आपली मोहोर उमटवली. आयसीसी अंडर 19 वर्ल्ड कप 2026 विजयानंतर भारतीय संघाचं रविवारी संध्याकाळी मुंबईतील आंतरराष्ट्रीय विमानतळावर जोरदार स्वागत करण्यात आलं. यावेळेस क्रिकेट चाहत्यांनी एकच गर्दी केली होती. आपल्या लाडक्या खेळाडूंना पाहण्यासाठी चाहते मोठ्या संख्येत उपस्थित होते. खेळाडूंनी चाहत्यांकडून शुभेच्छांचा स्वीकार केला आणि देशवासियांसह वर्ल्ड कप विजयाचा आनंद साजरा केला. त्यानंतर सर्व खेळाडू आपल्या घरी रवाना झाले. भारताचा कर्णधार विरारकर आयुष म्हात्रे आपल्या घरी पोहचला. त्यानंतर अवघ्या काही वेळात आयुषची जंगी मिरवणूक काढण्यात आली.
आयुषने वर्ल्ड कप जिंकून देत भारताचं नावं उंचावलं. तसेच आयुषमुळेच विरारचं नाव जागतिक पातळीवर पोहचलं. या वर्ल्ड कप विजेत्या कर्णधाराला पाहण्यासाठी वसई-विरारकरांनी एकच गर्दी केली. आयुषची एका चारचाकी गाडीतून ही विजयी मिरवणूक काढण्यात आली.
आयुषने नालासोपारा पूर्वमध्ये असलेल्या गणेश पार्क या मैदानातून क्रिकेटची सुरुवात केली. त्याच मैदानातून आयुषच्या विजयी मिरवणुकीची सुरुवात करण्यात आली. या मिरवणुकीत आयुषच्या नातेवाईकांसह वसई-विरारकर सहभागी झाले. आपल्या गावातल्या पोराने जगात नाव कमावल्याचा आनंद गावकऱ्यांचा चेहऱ्यावर या मिरवणुकीदरम्यान पाहायला मिळाला. तसेच चाहत्यांकडून मिरवणुकीत आयुष म्हात्रेचा जयघोष करण्यात आला.
ये आयुष दादा, छोट्या चाहत्यांची उपस्थिती
#WATCH | Maharashtra | Captain of the ICC Under-19 Cricket World Cup champion team, Ayush Mhatre, receives a grand welcome upon his arrival at his hometown, Virar. pic.twitter.com/qvuXdpFtmT
— ANI (@ANI) February 8, 2026
आयुषचं या विजयी मिरवणुकीचं ठिकठिकाणी स्थानिकांकडून स्वागत करण्यात आलं. आयुषचा हारतुऱ्यांनी सत्कार करण्यात आला. आयुषला पाहण्यासाठी त्याच्या छोट्या चाहत्यांनीही एकच गर्दी केली होती. “ये आयुष दादा”, अशी एका छोट्या चाहत्याने कॅप्टनला हाक मारली. हा व्हीडिओ सोशल मीडियावर व्हायरल झालाय.
आयुषची अंडर 19 वर्ल्ड कप स्पर्धेतील कामगिरी
दरम्यान आयुषने या अंडर 19 वर्ल्ड कप 2026 स्पर्धेत नेतृत्वासह बॅटिंग आणि बॉलिंगनेही योगदान दिलं. आयुषने 7 सामन्यांमधील 7 डावांत 30.57 च्या सरासरीने आणि 113.23 च्या स्ट्राईक रेटने एकूण 214 धावा केल्या. आयुष म्हात्रे याने या 7 डावांदरम्यान एकूण 14 षटकार आणि 20 चौकार लगावले.
