IND vs IRE: आयर्लंड दौरा संजू सॅमसनसाठी शेवटची संधी? त्याच्याजागी संघात एक पर्याय तयार

राजस्थान रॉयल्स कॅप्टन संजू सॅमसन

Image Credit source: BCCI

मुंबई: उद्या आयर्लंड विरुद्ध (IND vs IRE) सीरीजमधील पहिला टी 20 सामना होत आहे. सूर्यकुमार यादव (Suryakumar Yadav) आणि संजू सॅमसन (Sanju Samson) उद्या प्लेइंग 11 मध्ये खेळताना दिसतील. श्रेयस अय्यर आणि ऋषभ पंत यांच्या जागेवर त्यांचा समावेश करण्यात येईल. मुख्य कोच राहुल द्रविड यावेळी इंग्लंडमध्ये आहेत. ते इंग्लंड विरुद्धच्या मालिकेची तयारी करत आहेत. त्यांच्याजागी राष्ट्रीय क्रिकेट अकादमीचे प्रमुख व्हीव्ही एस लक्ष्मण युवा टीम इंडियाचे मार्गदर्शक म्हणून संघासोबत असतील. राहुल द्रविड यांनी आखलेल्या योजनेचे, ते अनुकरण करतील अशी अपेक्षा आहे. श्रेयस अय्यर आणि ऋषभ पंत कसोटी संघात आहेत. त्यामुळे त्यांच्याजागी सूर्यकुमार आणि सॅमसनचा सहभाग निश्चित आहे. सूर्यकुमार दुखापतीनंतर संघात पुनरागमन करतोय. संजू सॅमसनकडे आपली निवड सार्थ ठरवण्यासाठी ही शेवटची संधी असू शकते. सूर्यकुमार यादव मागच्या वर्षभरापासून भारताच्या टी 20 संघाचा नियमित खेळाडू आहे.

ऋतुराजला संधी मिळेल?

दीपक हुड्डा हा संजू सॅमसनला पर्यायही ठरु शकतो. ऑफ स्पिन गोलंदाजी करण्याबरोबरच मोठे फटके खेळण्याची हुड्डाची सुद्धा क्षमता आहे. राहुल द्रविडच्या कोचिंगची पद्धत बघितली, तर ते जास्त पर्याय शोधण्याच्या फंदात पडत नाहीत. ऋतुराज गायकवाडला दक्षिण आफ्रिकेविरुद्धच्या टी 20 सीरीजमध्ये प्रभाव पाडता आला नाही. त्याला आयर्लंड विरुद्ध संधी मिळू शकते.

दिनेश कार्तिक हार्दिकच्या आधी फलंदाजीला येणार?

इशान किशनने रिजर्व सलामीवीर म्हणून पुढच्या काही महिन्यांसाठी आपलं स्थान पक्क केलं आहे. पुढचे काही महिने त्याची हीच भूमिका राहू शकते. इंग्लंड विरुद्ध होणाऱ्या टी 20 मालिकेत तोच रोहितसोबत सलामीला उतरु शकतो. हार्दिक पंड्याने मागच्या सीरीजमध्ये पाचव्या क्रमांकावर फलंदाजी केली होती. त्याचा हाच क्रमांक कायम राहू शकतो. दिनेश कार्तिककडे विशिष्ट जबाबदारी आहे. परिस्थितीनुसार, तो हार्दिक पंड्याच्या आधी सुद्धा फलंदाजीला येऊ शकतो. जम्मू एक्स्पेस उमरान मलिक आणि अर्शदीप सिंह यांना संधी मिळणार की, नाही, या बद्दल स्पष्टत नाहीय.