IPL 2022: लखनौचे 7.5 कोटी रुपये पाण्यात, मॅच विनर खेळाडूला जोफ्रा आर्चरसारखी दुखापत

मार्क वुड-जोफ्रा आर्चर

Image Credit source: File photo

नवी दिल्ली: बहुचर्चित इंडियन प्रीमियर लीग स्पर्धेला (IPL) अवघ्या दोन आठवड्यांचा अवधी उरला आहे. असं असताना, प्रमुख संघांना एकापाठोपाठ एक धक्के बसत आहेत. यंदा आयपीएलचा 15 वा सीजन 26 मार्च रोजी सुरु होणार आहे. आयपीएलमधल्या फ्रेंचायजींनी वेगवेगळ्या परदेशी खेळाडूंना मोठी किंमत मोजून आपल्या ताफ्यात घेतलं आहे. अन्य देशांच्या क्रिकेट बोर्डांनी आखलेले दौरे तसंच दुखापतीमुळे अनेक खेळाडू मुख्य स्पर्धेला सुरुवात होण्याआधीच बाहेर पडत आहेत. दक्षिण आफ्रिकेचा एनरिक नॉर्खिया दुखापतीमुळे खेळू शकणार नाहीय. हा दिल्ली कॅपिटल्स (Delhi Capitals) संघासाठी एक झटका आहेच. पण आता लखनौ सुपर जायंट्सलाही (Lucknow super giants) वाईट बातमी मिळाली आहे. लखनौ सुपर जायंट्सचा मॅच विनिंग गोलंदाज मार्क वुडला दुखापत झाली आहे. एंटीगा टेस्ट दरम्यान मार्क वुडला गोलंदाजी करताना दुखापत झाली होती.

त्याच्या हाताचा कोपरा सूजला आहे. वेस्ट इंडिज आणि इंग्लंड दरम्यान कसोटी सामना सुरु आहे. दुखापतीमुळे मार्क वुडला पुढे गोलंदाजी करता आली नाही. वुडने फक्त चार षटक गोलंदाजी केली. त्याच्या कोपरामध्ये स्ट्रेस फ्रॅक्चर दिसत आहे.

जोफ्रा आर्चरसारखी दुखापत

मार्क वुडला जोफ्रा आर्चरसारखी दुखापत झाली आहे. त्याने वर्ष 2021 मध्ये कोपरा सुजल्याची तक्रार केली होती. जोफ्रा आर्चरची दोन ऑपरेशन्स झाली आहेत. मागच्या वर्षभरापासून आर्चर आंतरराष्ट्रीय क्रिकेट आणि आयपीएलपासून लांब आहे.

मार्क वुडची दुखापत लखनऊसाठी झटका

मार्क वुडला जोफ्रा आर्चरसारखी दुखापत झाली असेल, तर तो लखनऊ सुपर जायंट्ससाठी एक झटका आहे. लखनऊनने वुडसला 7.5 कोटी रुपये किंमतीला विकत घेतलं होतं. मार्क वुड 145 किमी प्रतितास वेगाने गोलंदाजी करु शकतो. वुडने नुकत्याच संपलेल्या ASHES मालिकेत 17 विकेट घेतल्या होत्या. लखनऊ सुपर जायंट्स आयपीएलमधला नवीन संघ आहे. यंदाचा त्यांचा पहिला सीजन आहे.

हे दोन आहेत अन्य पर्याय

लखनऊ सुपरजायंट्सने आयपीएल 2022 मेगा ऑक्शनमध्ये मार्क वुड शिवाय अंकित राजपूत आणि आवेश खान या वेगवान गोलंदाजांनाही ताफ्यात घेतलं आहे. वुडच लखनऊच्या गोलंदाजीचं नेतृत्व करणार आहे. पण त्याला दुखापत होणं हा संघासाठी मोठा झटका आहे.