Dhananjay Munde | ‘या’ स्टेडियमला शरद पवार यांचं नाव द्या, धनंजय मुंडे यांची मागणी
Dhananjay Munde On Sharad Pawar Cricket Stadium | आमदार धनंजय मुंडे यांनी महाराष्ट्र क्रिकेट असोसिएशनच्या अध्यक्षांकडे शरद पवार यांच स्टेडियमला नाव देण्याची मागणी केली आहे. नातू रोहित पवार आजोबांचं स्टेडियमला नाव देणार का?
मुंबई | क्रिकेट म्हणजे भारतीयांचा जीव की प्राण. क्रिकेट चाहते प्रत्येक सामना हा आवर्जुन पाहतात. गेल्या काही वर्षांपासून मोठ्या प्रमाणात टी 20 क्रिकेटला मोठ्या प्रमाणात पसंती मिळते आहे. आयपीएल स्पर्धेच्या पार्श्वभूमीवर प्रत्येक ठिकाणी टी 20 क्रिकेट स्पर्धेचं आयोजन केलं जात आहे. महाराष्ट्र क्रिकेट असोसिएशनकडून एमपीएल 2023 अर्थात महाराष्ट्र प्रीमिअर लीग स्पर्धेचं आयोजन करण्यात आलंय. या स्पर्धेला 15 जूनपासून सुरुवात झालीय. या स्पर्धेतील अंतिम सामना हा 29 जूनला पार पडणार आहे. अशा एकूण 15 दिवस ही स्पर्धेचा थरार रंगणार आहे.
एमपीएलमधील सर्व सामन्यांचं आयोजन हे महाराष्ट्र क्रिकेट असोसिएशनच्या गहुंजे स्टेडियममध्ये करण्यात आलंय. या एमपीएल स्पर्धेतील सलामीचा सामना हा पुणेरी बाप्पा विरुद्ध कोल्हापूर टस्कर्स यांच्यात पार पडला. या स्पर्धेच्या उद्घाटनाच्या कार्यक्रमाला महाराष्ट्र क्रिकेट असोसिएशनचे अध्यक्ष आणि कर्जत विधानसभा मतदारसंघाचे आमदार रोहित पवार आणि माजी सामाजिक न्यायमंत्री आणि आमदार धनंजय मुंडे उपस्थित होते.
— Dhananjay Munde (@dhananjay_munde) June 15, 2023
आता धनंजय मुंडे यांनी महाराष्ट्र क्रिकेट असोसिएशनचे अध्यक्ष रोहित पवार यांना पत्राद्वारे मागणी केलीय. गहुंजे स्टेडियमला शरद पवार यांचं नाव देण्यात यावं, अशा मागणीचं पत्र धनंजय मुंडे यांनी लिहिलंय. धनंजय मुंडे यांनी हे पत्र आणि शरद पवार यांचा वानखेडे स्टेडियममधील फोटो ट्विट केलाय.
धनंजय मुंडे यांच्या पत्रात काय?
धनंजय मुंडे यांनी आपल्या पत्रातून रोहित पवार यांचे एमपीएल स्पर्धेचं आयोजन करुन युवा खेळाडूंसाठी हक्काचं व्यासपीठ उपलब्ध करुन दिल्याबद्दल आभार मानलेत. त्यानंतर स्टेडियमला पवार साहेबांचं नाव देण्याची मागणीही केलीय. तसेच या पत्रात धनंजय मुंडे यांनी शरद पवार यांच्या क्रिकेटमधील योगदानाचंही उल्लेख केलंय.
धनंजय मुंडे यांचं रोहित पवार यांना पत्र
पद्मविभूषण आदरणीय @PawarSpeaks साहेबांचे क्रिकेट विश्वात मोठे योगदान आहे. साहेबांच्या या योगदानाचा सन्मान म्हणून पुण्यातील महाराष्ट्र क्रिकेट असोसिएशनच्या (गहुंजे) आंतरराष्ट्रीय मैदानास आदरणीय साहेबांचे नाव देण्यात यावे अशी मागणी एमसीएचे अध्यक्ष आमचे बंधू आ. @RRPSpeaks दादांकडे… pic.twitter.com/Ucag2XFlTf
— Dhananjay Munde (@dhananjay_munde) June 16, 2023
आता धनंजय मुंडे यांच्या या मागणीवर महाराष्ट्र क्रिकेट असोसिएशनकडून काय निर्णय घेतला जातो, याकडे महाराष्ट्रचं लक्ष असणार आहे.
दरम्यान आज शुक्रवारी एमपीएल क्रिकेट स्पर्धेतील पहिल्यावहिल्या डबल हेडरचं आयोजन करण्यात आलं. या डबल हेडरमधील पहिला सामना हा इगल नाशिक टायटन्स विरुद्ध छत्रपती संभाजी किंग्स यांच्यात पार पडला. तर त्यानंतर दुसऱ्या सामन्यात रत्नागिरी जेट्स विरुद्ध सोलापूर रॉयल्स आमनेसामने असणार आहेत. या सामन्याला रात्री 8 वाजता सुरुवात होणार आहे.
