IPL 2026 स्पर्धेत हर्षित राणाची जागा कोण घेणार? केकेआरने ठरवलं

कोलकाता नाईट रायडर्स चौथ्यांदा जेतेपदाला गवसणी घालण्यासाठी तयारीला लागली आहे. पण 19 व्या पर्वापूर्वी कोलकाता नाईट रायडर्स संघाला ग्रहण लागलं. बांगलादेशात होणाऱ्या हिंसाचारामुळे बांगलादेशी वेगवान गोलंदाज मुस्तफिझुर रहमान याला संघातून काढून टाकलं. त्याच्या जागा झिम्बाब्वेचा वेगवान गोलंदाज ब्लेसिंग मुजरबानी याने भरून काढली. पण ही जागा भरून काढत नाही तोच हर्षित राणा या स्पर्धेत खेळणार नसल्याचं समोर आलं. दुखापतीनंतर त्याच्यावर शस्त्रक्रिया झाली पण त्यातून काही सावरलेला नाही. त्यामुळे या स्पर्धेला मुकला आहे. असं असताना त्याची जागा भरून काढण्यासाठी केकेआर फ्रेंचायझीला धावाधाव करावी लागली. आता त्याची रिप्लेसमेंट केकेआरला मिळाली असून त्यासाठी जास्त पैसेही खर्च करावे लागणार नाहीत. रिपोर्टनुसार, सिमरजीत सिंह हर्षित राणाची जागा घेण्याची शक्यता आहे. मागच्या पर्वात अजिंक्य रहाणेच्या नेतृत्वात केकेआरची कामगिरी निराशाजनक राहिली. त्यामुळे यंदा केकेआरवर चांगल्या कामगिरीचा दबाव असणार आहे.

सिमरजीत सिंहला घेणार का?

सिमरजीत सिंहला केकेआरने संघात घेतलं तर ही त्याची तिसरी फ्रेंचायझी ठरेल. यापूर्वी सिमरजीत हा सनरायझर्स हैदराबाद आणि चेन्नई सुपर किंग्ससाठी खेळला आहे. त्यासाठी केकेआर फक्त 30 लाख रूपये मोजणार आहे. म्हणजेच हर्षित राणाच्या तुलनेत सिमरजीत सिंहला 3.70 कोटी रुपये कमी मिळतील. हर्षित राणाला केकेआरने 4 कोटी खर्च करून संघात घेतलं आहे. हर्षित राणाला टी20 वर्ल्डकप 2026 च्या सराव सामन्यात दुखापत झाली होती. दक्षिण अफ्रिकेविरुद्धच्या सराव सामन्यात त्याच्या गुडघ्याला दुखापत झाली होती. त्यानंतर शस्त्रक्रिया पार पडली. पण त्यातून अजूनही सावरलेला नाही.

सिमरजीत सिंह IPL करिअर

आयपीएल स्पर्धेत सिमरजीत सिंह पहिल्यांदा चेन्नई सुपर किंग्सकडून खेलला. आयपीएल स्पर्धेच्या दोन पर्वात चेन्नई सुपर किंग्सकडून खेळला. यावेळी त्याने 10 सामन्यात 9 विकेट घेतल्या. तर आयपीएल 2025 मध्ये सनरायझर्स हैदराबादचा भाग होता. त्याने 4 सामन्यात 2 विकेट घेतल्या. सिमरजीत सिंहने आयपीएल स्पर्धेतील 14 सामन्यात 11 विकेट घेतल्या. आता हर्षित राणाच्या जागी संधी मिळाली तर या संधीचं सोनं करण्याचा सिमरजीत सिंहचा प्रयत्न असेल.