IPL 2026: युजवेंद्र चहलला संघातील खेळाडूंनी आणलं गोत्यात, सर्व मेहनत एका झटक्यात पाण्यात

आयपीएल 2026 स्पर्धेत पंजाब किंग्सची कामगिरी जबरदस्त राहिली आहे. सर्वाधिक गुण मिळवत सध्या गुणतालिकेत अव्वल स्थानी आहेत. आता प्लेऑफचं स्थान दोन विजय दूर आहे. असं असताना शेवटच्या टप्प्यात पंजाब किंग्सकडून वारंवार चुका घडत आहे. त्यामुळे पंजाब किंग्सच्या चाहत्यांना आश्चर्याचा धक्का बसला आहे. सनरायझर्स हैदराबादविरुद्धच्या सामन्यात असंच पाहायला मिळालं. या सामन्यात पंजाब किंग्सच्या खेळाडूंनी तीन सोपे झेल सोडले. इतकंच काय तर हातातली स्टंपिंग सोडली. त्यामुळे पंजाब किंग्सच्या क्षेत्ररक्षणात काही चूक असल्याचं अधोरेखित झालं आहे. पंजाब किंग्सच्या खेळाडूंनी इशान किशनला एक नाही तर तीन संधी दिल्या. इतकंच काय हेनरिक क्लासेनचा सोपा झेल सोडला.

कोणत्या खेळाडूंनी झेल सोडला?

आयपीएल स्पर्धेत विकेट घेण्याची संधी सुटली तर त्याचा फटका गोलंदाजांना बसतो. इशान किशन 9 धावांवर असताना पहिलं जीवदान मिळालं. लोकी फर्ग्युसनच्या गोलंदाजीवर कूपर कॉनलीने सोपा झेल सोडला. त्यानंतर इशान 18 धावांवर असताना आणि एक जीवदान मिळालं. यावेळी झेल सोडण्याची चूक लोकी फर्ग्युसनने केली. इशान 20 धावांवर असताना युजवेंद्र चहलच्या गोलंदाजीवर प्रभसिमरन सिंगने सोपी स्टंपिंग सोडली. त्यामुळे युजवेंद्र चहल संतापल्याचं चेहऱ्यावरून स्पष्ट दिसलं. कारण इशानला दोन जीवदान मिळाले. इतकंच काय तर त्याच्या गोलंदाजीवर हेनरिक क्लासेनचा सोपा झेल सुटला. क्लासेन 9 धावांवर असताना शशांक सिंहने झेल सोडला.

युजवेंद्र चहल ठरला कमनशिबी

युजवेंद्र चहल टीम इंडियात पुन्हा एन्ट्री मारण्यासाठी मेहनत घेत आहे. पण त्याचं नुकसान संघातील खेळाडू करत आहे. या पर्वात त्याच्या खात्यातील 8 विकेट फुकट गेले. त्याच्या गोलंदाजीवर या पर्वात 7 झेल सुटले आणि एक स्टंपिंग मिस झाली.

दुसरीकडे, पंजाब किंग्सचा फलंदाज शशांक सिंहने या पर्वात सहा झेल सोडले. म्हणजेच 70 टक्के झेल एकट्या शशांकने सोडले. तर 30 टक्के झेल सोडण्यात पंजाबचे इतर खेळाडू आहेत. पंजाब किंग्सचं सुमार क्षेत्ररक्षण पाहून रिकी पॉन्टिंगही आश्चर्यचकीत झाला आहे. अशीच कामगिरी राहिली तर जेतेपदाचं स्वप्न पुन्हा भंगण्याची शक्यता आहे.