IND vs SLC XI : यशस्वी जैस्वाल या गोलंदाजांचा बनला गिऱ्हाईक, श्रीलंकेत पोल-खोल, 0 वर OUT
IND vs SLC XI : टीम इंडियाचा सलामीवीर यशस्वी जैस्वाल या खास प्रकारच्या गोलंदाजांचा गिऱ्हाईक बनत चालला आहे. त्यांच्या गोलंदाजीचं यशस्वी जैस्वालकडे उत्तरच नाही. यशस्वीला त्यांची गोलंदाजी खेळणचं झेपत नाहीय.
Yashasvi Jaiswal Struggle Against Left-Arm Pacer : भारत-श्रीलंकेमध्ये दोन टेस्ट मॅचची सीरीज होणार आहे. त्याआधी टीम इंडियाचा सराव सामना सुरु आहे. या सराव सामन्यातून टीम इंडियाच्या कमकुवत बाजू उघड होत चालल्या आहेत. भारतीय टीमचा ओपनर यशस्वी जैस्वालच्या खराब फॉर्मने टीम इंडियाची चिंता वाढवली आहे. कोलंबोच्या नॉन्डिसक्रिप्ट्स क्रिकेट क्लबवर श्रीलंका प्लेइंग XI विरुद्ध सराव सामना सुरु आहे. या सामन्यात यशस्वीला भोपळाही फोडता आला नाही. अवघ्या 2 चेंडूत त्याने पॅव्हेलियनची वाट धरली. पुन्हा एकदा यशस्वीला डावखुऱ्या गोलंदाजाने गुंडाळलं. डावखुऱ्या गोलंदाजांनी यशस्वीची कमजोरी हेरली आहे. श्रीलंका प्लेइंग XI ने 8 विकेट गमावून 363 धावांवर डाव घोषित केला. त्यानंतर केएल राहुलसोबत यशस्वी डावाची सुरुवात करण्यासाठी मैदानात उतरला होता. श्रीलंकेचा डावखुरा वेगवान गोलंदाज विश्वा फर्नांडोने यशस्वीला सहज जाळ्यात अडकवलं. इनिंगच्या दुसऱ्या चेंडूवर ऑफ-स्टंप बाहेर जाणारा चेंडू यशस्वी कुठल्याही फुटवर्क शिवाय खेळायला गेला. त्याने बॅट फिरवली पण चेंडू सहज फिल्डरच्या हातात विसावला. त्याने सोपा झेल दिला.
कसोटी क्रिकेटमध्ये लेफ्ट-आर्म पेस गोलंदाजांचा सामना करणं यशस्वी जैस्वालसाठी दिवसेंदिवस आव्हानात्मक बनत चाललं आहे. डावखुऱ्या गोलंदाजांसमोर यशस्वीचं तंत्र कमी पडतय. टेस्ट क्रिकेटमध्ये यशस्वी जैस्वालला आतापर्यंत 9 वेळा डावखुऱ्या वेगवान गोलंदाजाने आऊट केलय. मागच्यावर्षी दक्षिण आफ्रिकेविरुद्ध भारतात WTC टेस्ट सीरीज झाली. त्यावेळी चार पैकी तीनवेळा मार्को जॅनसनने त्याला आऊट केलं. भारताने ही मालिका 0-2 ने गमावली.
कितीवेळा शुन्यावर OUT
मार्को जॅनसन शिवाय कसोटी क्रिकेटमध्ये ऑस्ट्रेलियाचा वेगवान गोलंदाज मिचेल स्टार्क आणि दक्षिण आफ्रिकेच्या नांद्रे बर्गरने सुद्धा त्याला 3-3 वेळा आऊट केलय. यशस्वीच्या या प्रदर्शनाने आगामी दोन कसोटी सामन्यांच्या सीरीजसाठी टीम इंडियाचं टेन्शन वाढवलं आहे. श्रीलंका त्याच्या या कमकुवत बाजूचा पूर्णपणे फायदा उचलण्याचा प्रयत्न करणार. कसोटी क्रिकेटमध्ये यशस्वीच्या अलीकडच्या इनिंगचे आकडे पाहिले, तर त्याचा संघर्ष पूर्णपणे कळून येतो. मागच्या पाच टेस्ट इनिंगमध्ये त्याने फक्त एक हाफ सेंच्युरी झळकवली आहे. वॉर्म अप मॅचचा समावेश केल्यास मागच्या 6 इनिंगमध्ये दोनवेळा तो खातं न उघडताच तंबूत परतलाय.
