IND W vs PAK W : 27वर 1 विकेट अन् 55वर ऑलआऊट; टीम इंडियाने पाकिस्तानची हवाच काढली, आशिया कपमध्ये विजयाची हॅटट्रिक
महिला आशिया कपमध्ये भारताचा पाकिस्तानवर पुन्हा एकदा दणदणीत विजय. भारतीय फिरकीसमोर पाकिस्तानी फलंदाज अक्षरशः ढेपाळले. त्यानंतर भारताने ७ विकेट्सनी जिंकत विजयाची हॅटट्रिक केली.
महिला आशिया कपमधील आजच्या सामन्यात भारताने पाकिस्तानचा धुव्वा उडवला आहे. दुबईमध्ये पार पडलेल्या या सामन्यात भारताने पाकिस्तानला 7 विकेट्सने हरवलं आहे. पाकिस्तानविरुद्ध भारताचा विजयरथ सुरुच आहे. आजच्या सामन्यामध्ये तर भारताची सामन्यावर सुरुवातीपासूनच जबरदस्त पकड पाहायला मिळाली. या सामन्यात भारताच्या गोलंदाजांनी विरोधकांना काहीच करु दिले नाही. त्यामुळे नाणेफेक जिंकून सुरुवातीला फलंदाजीला आलेल्या पाकिस्तानच्या महिला संघाला केवळ 55 धावांवर भारतीय वाघिणींनी ऑल आऊट केलं.
27 धावांनंतर 28 धावांत 9 विकेट्स
पाकिस्तानची कर्णधार फातिमा सना हिने टॉस जिंकून प्रथम फलंदाजीचा निर्णय घेतला. सुरुवातीला पाकिस्तानच्या सलामीवीरांनी 27 धावांची भागीदारी केली. मात्र त्यानंतर भारतीय फिरकीपटूंनी सामन्याचं चित्रच बदलून टाकलं. श्री चरणीने 3 विकेट्स घेताना 7 धावा दिल्या. दीप्ती शर्माने 2 विकेट्स घेतल्या, तर प्रेमा रावतने 3 विकेट्स मिळवल्या. शेफाली वर्मानेही एक विकेट घेतली. भारतीय स्पिनर्सच्या या माऱ्यासमोर पाकिस्तानचा डाव 55 धावांवर संपला. हा पाकिस्तानच्या महिला टी-20 आंतरराष्ट्रीय क्रिकेटमधील सर्वात कमी धावसंख्येपैकी एक ठरला.
त्यानंतर भारताला जिंकण्यासाठी माफक 56 धावाच हव्या होत्या. त्यामुळे भारतीय महिला फलंदाजीला उतरताच काहीच वेळात सामना संपला. भारताने हे लक्ष्य अवघ्या 52 चेंडूत गाठत 7 विकेट्सनी विजय मिळवला. म्हणजेच टीम इंडियाने तब्बल 68 चेंडू शिल्लक ठेवत सामना संपवला. या विजयासह भारताने ग्रुप स्टेजचा शेवट सलग तिसऱ्या विजयाने केला.
भारताचा सहज विजय
लहान लक्ष्याचा पाठलाग करताना भारताला सुरुवातीला काही धक्के बसले. मात्र मधल्या फळीने संयमी फलंदाजी करत सामना हातातून जाऊ दिला नाही. अखेर भारताने 7 विकेट्स राखून विजय मिळवला. दरम्यान, यंदाच्या आशियाकपमध्ये भारताचा विजयीरथ सुरुच आहे. भारताने याआधी थायलंड आणि हाँगकाँगविरुद्धही विजय मिळवत सेमीफायनलमध्ये प्रवेश निश्चित केला होता. हाँगकाँगविरुद्ध स्मृती मानधनाने 124 धावांची विक्रमी खेळी केली होती.
पाकिस्तानचा भारताविरुद्ध पुन्हा पराभव
याशिवाय भारताने विजयामुळे भारताने पाकिस्तानविरुद्धच्या टी-20 सामन्यांमधील वर्चस्व कायम ठेवलं. पाकिस्तानला भारताविरुद्ध विजय मिळवण्याची प्रतीक्षा पुन्हा एकदा कायम राहिली आहे. फातिमा सनाच्या नेतृत्वाखालील पाकिस्तान संघाला यावेळीही भारताला पराभूत करता आलेले नाही.
