‘…मग तुमची उदबत्ती पेटवा’, गोपीचंद पडळकरांचा गाण्यातून कोणाला इशारा?
आमदार गोपीचंद पडळकरांचा नवा अवतार. राजकारणानंतर आता गाण्याच्या माध्यमातून शक्तिप्रदर्शन. सोशल मीडियावर जोरदार चर्चा.
Gopichand Padalkar New Song: नेहमी आक्रमक वक्तव्यांमुळे चर्चेत असणारे आणि वंचित बहुजन आघाडीतून भाजपमध्ये प्रवेश केलेले आमदार गोपीचंद पडळकर पुन्हा एकदा चर्चेत आले आहेत. मात्र, यावेळी कारण राजकीय भाष्य नसून, त्यांचं नवं मराठी गाणं आहे. 2 फेब्रुवारी रोजी प्रदर्शित झालेल्या या गाण्याने सोशल मीडियावर चांगलाच गाजावाजा केला आहे.
‘आमच्या नादाला लागण्याआधी… एकदा होळकरशाही आठवा’ असे रोखठोक आणि आक्रमक बोल असलेलं हे गाणं सध्या विशेष चर्चेत आहे. या गाण्यात खुद्द गोपीचंद पडळकर मुख्य भूमिकेत दिसत असून त्यांनी गाण्याच्या ठेक्यावर स्वतः दमदार वावर करत चाहत्यांचं लक्ष वेधून घेतलं आहे. राजकारणात जशा त्यांच्या भूमिका ठाम आणि परखड असतात तसाच आत्मविश्वास या गाण्यातूनही दिसून येतो आहे.
या गाण्याचं लेखन सचिन माळी यांनी केलं असून मिलिंद शिंदे यांनी गाणं गायलं आहे. संगीताची जबाबदारी मिलिंद शिंदे, शीतल साठे आणि अनिकेत मोहिते यांनी सांभाळली आहे. सध्या संपूर्ण गाण्यातील गोपीचंद पडळकरांचा पडद्यावरील वावर एखाद्या अनुभवी अभिनेत्यालाही टक्कर देणारा असल्याचं त्यांच्या समर्थकांचं म्हणणं आहे.
गोपीचंद पडळकर हे धनगर समाजाचे प्रमुख नेते म्हणून ओळखले जातात. धनगर आरक्षणासह समाजाच्या विविध मागण्यांसाठी झालेल्या अनेक आंदोलनांचं नेतृत्व त्यांनी केलं आहे. त्यांच्या राजकीय प्रवासाबाबत बोलायचं झालं तर लोकसभा निवडणुकांच्या काळात मतभेदांमुळे त्यांनी भाजपला रामराम ठोकत वंचित बहुजन आघाडीत प्रवेश केला होता. मात्र वंचितकडून लोकसभा निवडणूक लढवून त्यांना पराभव स्वीकारावा लागला.
काही तासांमध्ये लाखो व्ह्यूज
यानंतर विधानसभा निवडणुकीच्या तोंडावर त्यांनी पुन्हा भाजपमध्ये घरवापसी केली. भाजपच्या तिकिटावर त्यांनी बारामतीत विधानसभा निवडणूक लढवली, मात्र अजित पवारांकडून त्यांचा मोठ्या फरकाने पराभव झाला आणि डिपॉझिटही जप्त झालं. तरीही भाजपने त्यांच्यावर विश्वास दाखवत त्यांना विधानपरिषदेत संधी दिली.
दरम्यान, राजकारणासोबतच आता कला क्षेत्रातही आपली उपस्थिती दाखवणाऱ्या गोपीचंद पडळकरांच्या या गाण्याला सोशल मीडियावर चांगला प्रतिसाद मिळत आहे. गाणं रिलीज झाल्यानंतर अवघ्या 24 तासांतच याला दीड लाखांहून अधिक व्ह्यूज मिळाले आहेत. अनेक कार्यकर्ते आणि समर्थकांनी कमेंट्सद्वारे गाण्याचं आणि पडळकरांच्या या नव्या रूपाचं भरभरून कौतुक केलं आहे.
