Aaditya Thackeray | दिशा सालियन प्रकरणाशी माझा काडीमात्र संबंध नाही! आदित्य ठाकरेंचं मोठं वक्तव्य; राम कदमांचा थेट सवाल

“दिशा सालियन मृत्यू प्रकरणाशी माझा काडीमात्र संबंध नाही, त्यावर बोलून काय अर्थ आहे?” असे वक्तव्य युवासेना नेते आदित्य ठाकरे यांनी केले आहे. दिशा सालियन प्रकरणाच्या केंद्रीय अन्वेषण विभागाच्या (CBI) तपासावर विचारणा केली असता, त्यांनी ही प्रतिक्रिया दिली. हे प्रकरण पुन्हा एकदा चर्चेत आले असून, त्यावर विविध राजकीय प्रतिक्रिया उमटत आहेत.

यावर भाजप नेते राम कदम यांनी आदित्य ठाकरेंना थेट प्रश्न विचारला आहे. ते म्हणाले, “जर आदित्य ठाकरेंचा या प्रकरणाशी काडीमात्र संबंध नव्हता, तर तत्कालीन उद्धव ठाकरे सरकारने हे प्रकरण सीबीआयकडे सोपवण्यास नकार का दिला?” राम कदम यांनी असेही म्हटले की, दिशा सालियनच्या कुटुंबीयांनी अनेकदा उद्धव ठाकरे सरकारकडे या प्रकरणाचा सीबीआय तपास करण्याची विनंती केली होती. परंतु, तत्कालीन सरकारने त्यांची मागणी ऐकली नाही. “कर नाही त्याला डर कशाला? त्यावेळेस ठाकरे सरकारने हे प्रकरण सीबीआयकडे द्यायला हवे होते,” असेही कदम यांनी नमूद केले.

दिशा सालियन मृत्यू प्रकरण पुन्हा एकदा सीबीआयच्या कक्षेत आल्याने आणि त्यावर राजकीय वर्तुळात आरोप-प्रत्यारोप सुरू झाल्याने, या प्रकरणातील पुढील घडामोडींकडे सर्वांचे लक्ष वेधले आहे. आदित्य ठाकरेंच्या भूमिकेवर भाजपने प्रश्नचिन्ह उपस्थित करत, पूर्वीच्या सरकारच्या कार्यपद्धतीवर प्रश्नचिन्ह निर्माण केले आहे.