कुंभमेळ्याला बदनाम करणे थांबवा, अन्यथा नाशिककर चोप देतील; बड्या नेत्याचा राऊतांना इशारा

भाजपचे नेते अजित चव्हाण यांनी शिवसेना (उद्धव बाळासाहेब ठाकरे) नेते संजय राऊत यांना नाशिकमध्ये कुंभमेळ्याला बदनाम करणे थांबवण्याचा थेट इशारा दिला आहे. राऊत यांनी सातत्याने हिंदुत्वविरोधी भूमिका घेणे आणि कुंभमेळ्याची बदनामी करणे सुरू ठेवल्यास, पुढच्या वेळी संजय राऊत नाशिकमध्ये येतील, तेव्हा नाशिककर त्यांना योग्य धडा शिकवतील, असे चव्हाण यांनी म्हटले आहे.

नाशिकमध्ये झालेल्या मुख्यमंत्री देवेंद्र फडणवीस यांच्या एका कार्यक्रमावर संजय राऊत यांनी टीका केली होती. या टीकेला उत्तर देताना अजित चव्हाण यांनी राऊतांवर जोरदार पलटवार केला. चव्हाण म्हणाले की, “ज्यांचा पक्ष साडेतीन जिल्ह्यांमध्ये उरलेला आहे, त्या संजय राऊत यांनी सातत्याने हिंदुत्वविरोधी भूमिका घेऊन कुंभमेळ्याला बदनाम करणे थांबवले नाही, तर नाशिकमधील जनता त्यांना चोप देईल.” सध्या अशीच परिस्थिती निर्माण झाली असल्याचेही त्यांनी अधोरेखित केले. चव्हाण यांच्या या इशाऱ्यामुळे नाशिकच्या राजकारणात आणखी ताप निर्माण होण्याची शक्यता आहे.