अजितदादांकडून फडणवीसांची भेट; मोठं कारण आलं समोर

अजित पवार यांनी काल मुख्यमंत्री देवेंद्र फडणवीस यांची भेट घेऊन महाराष्ट्राच्या राजकारणात दोन मोठ्या घडामोडींवर चर्चा केली. या भेटीचे मुख्य कारण माणिकराव कोकाटे यांच्या राजीनाम्याबाबतची चर्चा असल्याचे सूत्रांनी सांगितले. कोकाटेंना दिलासा न मिळाल्यास शुक्रवारी ते राजीनामा देणार असल्याची माहिती आहे, मात्र फडणवीस त्यांच्या राजीनाम्यावर ठाम असल्याचे समजते. या भेटीपूर्वीच फडणवीस यांनी कोकाटेंकडील क्रीडा आणि युवक कल्याण तसेच अल्पसंख्याक आणि वक्फ ही खाती काढून घेऊन ती अजित पवार यांच्याकडे सोपवली आहेत. आता कोकाटे बिन खात्याचे मंत्री असून त्यांच्या अटकेची टांगती तलवार कायम आहे.

दुसरीकडे, धनंजय मुंडे यांच्या मंत्रिमंडळातील संभाव्य पुनरागमनावरही चर्चा सुरू आहे. मुंडेंनी नुकतीच अमित शहा यांची भेट घेतल्यानंतर त्यांच्या मंत्रीपदाच्या चर्चांनी जोर धरला आहे. या पुनरागमनाला सुप्रिया सुळे यांनी तीव्र विरोध दर्शवला असून, मुंडेंना मंत्रिमंडळात घेतल्यास बीडमध्ये उपोषण करण्याचा इशारा त्यांनी दिला आहे. अंजली दमानिया यांनीही मुंडेंच्या विरोधात बावन्नकुळे यांची भेट घेतली आहे. वाल्मिक कराड प्रकरणानंतर मुंडेंना मंत्रीपद सोडावे लागले होते. सध्या महाराष्ट्रात या दोन राजकीय घडामोडींनी वातावरण तापले आहे.