महाविकास आघाडीत बिघाडी? ठाकरे गटाने मित्रपक्षाच्या विरुद्धच उभा केला उमेदवार, सामना’तून दिली माहिती

अमरावतीमध्ये महाविकास आघाडीमध्ये (मविआ) बिघाडी निर्माण झाली असून, ठाकरे गटाच्या शिवसेनेने काँग्रेसच्या विरोधात उमेदवार जाहीर केला आहे. अमरावती शिक्षक मतदारसंघासाठी काँग्रेसने आदिती लहाने यांच्या नावाची घोषणा केली असताना, ठाकरे गटाने दत्तात्रय लहाने यांना उमेदवारी दिली आहे. यामुळे मविआतील घटक पक्षांमध्ये स्थानिक पातळीवर मतभेद उघड झाले आहेत. यापूर्वी महाविकास आघाडीच्या दोन बैठका झाल्या होत्या, परंतु अमरावती मतदारसंघातील उमेदवारीबाबत कोणताही तोडगा निघाला नव्हता.

काँग्रेसने आदिती लहाने यांची उमेदवारी जाहीर केल्यानंतर, स्थानिक ठाकरे गटाच्या पदाधिकाऱ्यांनी काँग्रेसने विश्वासात न घेता निर्णय घेतल्याचा आरोप केला होता. यानंतर आज ठाकरे गटाने आपले उमेदवार जाहीर केले. या उमेदवारी घोषणेमुळे अमरावती शिक्षक मतदारसंघात मविआतील एकजुटीवर प्रश्नचिन्ह निर्माण झाले आहे. ठाकरे गटाने छत्रपती संभाजीनगर पदवीधर मतदारसंघासाठी दिलीप घुगे यांनाही उमेदवारी दिली आहे. या राजकीय घडामोडींमुळे महाविकास आघाडीमध्ये तणावाचे वातावरण निर्माण झाले आहे. पुणे पदवीधर मतदारसंघासाठी अद्याप उमेदवारी निश्चित झालेली नाही.