संजय राऊत यांच्या वक्तव्यावर आक्षेप असेल तर मुख्यमंत्र्यांच्या ‘त्या’ विधानाचीही दखल घ्या; ठाकरेगटाचा पलटवार

मुंबई : खासदार संजय राऊत यांच्या विधानावर आज विधिमंडळ अधिवेशनात आक्षेप घेण्यात आला. याला ठाकरेगटाचे आमदार अनिल परब यांनी जोरदार प्रत्युत्तर दिलं आहे. “सभागृहाचा अपमान होऊ नये. या मताशी आम्ही सहमत आहोत. हा अपमान कोणत्या पक्षाच्या व्यक्तीने केला हा मुद्दा जास्त महत्वाचा नाहीये. आम्ही या बाबतीत सहमत आहोत. पण ज्या पद्धतीने संजय राऊत यांच्या वक्तव्यावर आक्षेप घेतला जातोय. चोरमंडळ म्हणून उल्लेख केल्यावर जसं सत्ताधाऱ्यांनी आक्षेप घेतलाय. तसं विरोधी पक्षातील नेत्यांना देशद्रोही म्हणण्याचा विषय देखील तेवढाच गंभीर आहे. याचीही नोंद घेण्यात यावी. सभागृहात एक ठराव पारित करून टाका. जेव्हा विधिमंडळाचा अपमान होईल तेव्हा सगळ्यांना सारखा न्याय मिळेल”, असं अनिल परब म्हणालेत.