Laxman Hake : लक्ष्मण हाकेंवर आतापर्यंत नऊ हल्ले! अहिल्यानगरमध्ये कुणी केला वाहनावर हल्ला?

ओबीसी नेते लक्ष्मण हाके यांच्या गाडीवर अहमदनगर (अहिल्यानगर) येथे अज्ञात तरुणांनी हल्ला केला. ही घटना दौंड मार्गे पाथर्डीकडे जात असताना नगर बायपासजवळ घडली. हल्ल्यात हाकेंच्या गाडीच्या मागील बाजूची काच फुटली आणि नंबर प्लेट खाली पडली. या प्रकरणी अहमदनगर तालुका पोलिसांनी त्वरित कारवाई करत तिघा हल्लेखोरांना ताब्यात घेतले आहे. लक्ष्मण हाके यांनी ही घटना गंभीर असून, ओबीसी समाजासाठी आवाज उचलल्याने त्यांच्यावर सातत्याने हल्ले होत असल्याचा आरोप केला.

हाके यांच्या म्हणण्यानुसार, उपोषण सुरू केल्यापासून त्यांच्यावर झालेला हा नववा हल्ला आहे. त्यांनी मुख्यमंत्री आणि गृह विभागाला महाराष्ट्रातील ओबीसींच्या सुरक्षिततेबाबत आणि त्यांच्या प्रश्नांवर लक्ष देण्याचे आवाहन केले आहे. अहमदनगर तालुका पोलीस ठाण्यात या घटनेची नोंदणी प्रक्रिया सुरू आहे.