Phaltan Doctor Death Case : बीड ते परळी मार्ग ठप्प, सर्वपक्षीय नेते अन् संघटना रस्त्यावर, कडकडीत बंद… नेमकं घडतंय काय?

फलटण येथील उपजिल्हा रुग्णालयात कार्यरत असलेल्या एका महिला डॉक्टरने आत्महत्या केल्याच्या निषेधार्थ बीड जिल्ह्यातील वडवणी शहर आज कडकडीत बंद ठेवण्यात आले आहे. या घटनेने परिसरात तीव्र संताप व्यक्त होत असून, सर्व पक्ष आणि संघटनांनी बंदचे आवाहन केले आहे. अहवालानुसार, संबंधित महिला डॉक्टरने फलटण येथे एका हॉटेलच्या खोलीत गळफास लावून आत्महत्या केली होती. तिच्या सुसाईड नोटमध्ये दोन आरोपींची नावे नमूद करण्यात आली आहेत. गोपाल बदने आणि प्रशांत बुनकर अशी आरोपींची नावे समोर आली आहेत. केवळ या दोघांवरच नव्हे, तर छळ करणाऱ्या इतर लोकांवरही कठोर कारवाई करण्याची मागणी आंदोलकांकडून केली जात आहे.

आज सकाळी वडवणी शहरातील मुख्य छत्रपती शिवाजी महाराज चौकामध्ये रास्ता रोको आंदोलनही करण्यात आले. आरोपींवर जलदगतीने आणि कठोर कारवाई व्हावी, तसेच या प्रकरणाचा सखोल तपास करण्यासाठी एसआयटी (विशेष तपास पथक) गठीत करावी, अशी मागणी आंदोलनकर्त्यांनी केली आहे. आरोपींना फाशीची शिक्षा व्हावी अशी तीव्र भावना व्यक्त केली जात आहे.