शिंदे, फडणवीस की पवार? मुख्यमंत्रीपदाच्या शर्यतीवर भास्कर जाधवांचे संकेत

नागपूर अधिवेशनात बोलताना आमदार भास्कर जाधव यांनी महाराष्ट्रातील राजकारणावर अनेक महत्त्वपूर्ण मुद्द्यांवर प्रकाश टाकला. विरोधी पक्षनेतेपदाचा मुद्दा अजूनही प्रलंबित असल्याने त्यांनी सरकारवर जोरदार टीका केली. माजी मुख्यमंत्री पृथ्वीराज चव्हाण यांच्या मताशी सहमती दर्शवत जाधव यांनी स्पष्ट केले की, विरोधी पक्षनेतेपदाचा विषय कोणीतरी हेतुपुरस्सर टाळत आहे. लोकशाही मूल्यांवर सरकारचा विश्वास कमी झाला असून, मिळेल ते लाटायचं पण द्यायचं काही नाही अशी प्रवृत्ती दिसून येत असल्याचे त्यांनी म्हटले.

एकनाथ शिंदे, देवेंद्र फडणवीस किंवा अजित पवार यापैकी कोण मुख्यमंत्री होणार, हा त्यांचा अंतर्गत प्रश्न असल्याचे जाधव यांनी नमूद केले. प्रकाश आंबेडकरांनी एकनाथ शिंदे पुन्हा मुख्यमंत्री होऊ शकतात या विधानावर ते बोलत होते. तसेच, पृथ्वीराज चव्हाण यांनी १९ डिसेंबरनंतर पंतप्रधान बदलू शकतात असे केलेल्या वक्तव्याकडे गंभीरपणे पाहण्याची गरज असल्याचे जाधव यांनी सांगितले. चव्हाण हे अनुभवी नेते असून, त्यांची विधाने गांभीर्याने घ्यायला हवीत, असे भास्कर जाधव म्हणाले.