Nagpur Farmer Protest :’भाऊ म्हणाले आमदारांना कापा, मी सांगतो मंत्र्यांनाच कापा’, कडूंच्या मोर्चात वादग्रस्त वक्तव्य

शेतकरी नेते रवीकांत तुपकर यांनी बच्चू कडूंच्या ट्रॅक्टर मोर्च्यादरम्यान एक वादग्रस्त विधान केले आहे. आत्महत्या न करण्याचे आवाहन करत, जसे बच्चू भाऊंनी आमदारांना कापायला सांगितले, मी त्याही पुढे जाऊन दोन-चार मंत्र्यांना कापायला सांगतो, पण आता मागे हटायचे नाही, असे प्रक्षोभक वक्तव्य त्यांनी केले.

या विधानानंतर भारतीय जनता पक्षाचे नेते चंद्रशेखर बावनकुळे यांनी यावर प्रतिक्रिया दिली आहे. बावनकुळे यांनी स्पष्ट केले की, अशा प्रकारची भाषा लोकशाहीमध्ये योग्य नाही. त्यांनी सर्वांना संविधानिक आणि लोकशाही मार्गाने आंदोलन करण्याचे आवाहन केले. कोणीही प्रक्षोभक भाषा वापरू नये. जमावाला चिथावणी देणे, जाळपोळ करणे किंवा मॉबला प्रवृत्त करणे अशा गोष्टी कुणीही करू नये, असे आवाहन बावनकुळे यांनी केले. लोकशाहीत आंदोलनाचे मार्ग हे शांततापूर्ण आणि नियमांनुसार असावेत, असे त्यांनी अधोरेखित केले.