Devendra Fadnavis : दोन्ही ठाकरे बंधू एकत्र येताच फडणवीस यांची पहिली प्रतिक्रिया; म्हणाले मुंबईकर…

मुख्यमंत्री देवेंद्र फडणवीस यांनी राज ठाकरे आणि उद्धव ठाकरे यांच्या संभाव्य राजकीय एकत्रिकरणाबाबत आपली भूमिका स्पष्ट केली आहे. हे एकत्रिकरण राजकीयदृष्ट्या फार महत्त्वाचे नाही, असे मत त्यांनी व्यक्त केले. फडणवीस यांच्या मते, ही युती केवळ संबंधित पक्षांना आपले अस्तित्व टिकवण्यासाठी करावी लागणारी आहे आणि यातून फार मोठे राजकीय परिणाम अपेक्षित नाहीत. त्यांनी ठाकरेंच्या नेतृत्वाखालील गटांवर मुंबईकरांचा विश्वासघात केल्याचा आणि मराठी माणसाला मुंबईबाहेर घालवल्याचा आरोप केला. त्यांचा कार्यकाळ केवळ भ्रष्टाचार आणि स्वहिताचा असल्याचा दावाही फडणवीस यांनी केला. निवडणुका जवळ आल्या की भावनिक मुद्दे उपस्थित केले जातात, परंतु आता जनता अशा गोष्टींना भुलणार नाही असे ते म्हणाले. मुंबईकर महायुतीच्या विकासाच्या कामाला आणि मराठी माणसाला मुंबईतच घरे देण्याच्या कार्यक्रमाला पाठिंबा देतील, असा विश्वास त्यांनी व्यक्त केला.