CM Devendra Fadnavis : महाराष्ट्र धर्म; मुख्यमंत्र्यांनी सुरू केला पॉडकास्ट

आषाढी एकादशीच्या पवित्र प्रसंगी पहाटे २:३० वाजता मुख्यमंत्री देवेंद्र फडणवीस यांनी सपत्नीक विठ्ठल-रुक्मिणीची शासकीय महापूजा संपन्न केली. या निमित्ताने त्यांनी ‘महाराष्ट्र पॉडकास्ट’ नावाची एक नवीन मालिका सुरू केली. या मालिकेत त्यांनी वारीच्या ऐतिहासिक महत्त्वाबरोबरच महाराष्ट्राच्या पवित्र भूमीचे वैशिष्ट्य अधोरेखित केले.

फडणवीस म्हणाले, महाराष्ट्राचे वेगळेपण समजून घेण्यासाठी आपल्याला इतिहासात डोकावावे लागेल. महाराष्ट्राची कहाणी ही देवाच्या पावलांनी सुरू होते. रामायणात याचा उल्लेख आहे. श्रीराम वनवासात असताना दंडकअरण्यात आले, जिथे आजचा विदर्भ आणि नाशिक परिसरात घनदाट जंगले होती. पंचवटी हा सर्वपरिचित परिसर आहे, जो रामायणातील भूगोलाचा जिवंत भाग आहे. याच ठिकाणी लक्ष्मणाने लक्ष्मण रेषा आखली होती आणि रावणाने साधूच्या वेशात येऊन सीतामाईचे हरण केले. येथेच धर्म आणि अधर्म यांच्यातील संघर्ष तीव्र झाला. सत्याचा विजय होतो, हे आपण नेहमीच सांगत आलो आहोत.