BMC Elections : कोणतीही तडजोड नाही, वंचितकडून काँग्रेसला मोठा प्रस्ताव अन् राज्यात चर्चा सुरू

राजकीय वर्तुळातून एक महत्त्वाची बातमी समोर आली आहे की, आगामी महानगरपालिका निवडणुकांसाठी वंचित बहुजन आघाडीने (VBA) काँग्रेसला ४३ जागांचा प्रस्ताव दिला आहे. वंचितने या ४३ जागांबाबत कोणतीही तडजोड करणार नसल्याचे स्पष्ट केले आहे. या प्रस्तावावर काँग्रेसची काय प्रतिक्रिया येते, याकडे सर्वांचे लक्ष लागले आहे. मुंबई महानगरपालिकेच्या निवडणुकीमध्ये काँग्रेस आणि वंचित बहुजन आघाडी यांच्यात युती करण्यासंदर्भात चर्चा सुरू होती. यासाठी काँग्रेसकडून नेत्यांची एक समितीही नेमण्यात आली होती आणि मुंबई काँग्रेस व वंचित बहुजन आघाडी यांच्यात दोन बैठका पार पडल्या आहेत.

या बैठकांमध्ये वंचित बहुजन आघाडीने ४३ जागांचा युतीचा प्रस्ताव काँग्रेसकडे मांडला होता. मात्र, सूत्रांकडून मिळालेल्या माहितीनुसार, काँग्रेस फक्त ७ जागा वंचित बहुजन आघाडीला देण्यास अनुकूल आहे. यावर वंचित बहुजन आघाडीच्या नेत्यांनी तीव्र नाराजी व्यक्त केली असून, काँग्रेसला खरोखरच वंचित बहुजन आघाडीबरोबर युती करण्याची इच्छा आहे का, असा सवाल त्यांनी उपस्थित केला आहे. हा वादग्रस्त जागावाटप प्रस्ताव आगामी मुंबई महानगरपालिका निवडणुकांमधील युतीच्या भवितव्यावर प्रश्नचिन्ह निर्माण करत आहे.