Dangerous Jetty : मालवणमध्ये फिरायला जाताय? जरा जपून…. सिंधुदुर्ग किल्ल्याकडे जाणाऱ्या जेटीची अवस्था बघा! सुरक्षेचा प्रश्न ऐरणीवर

महाराष्ट्रातील ऐतिहासिक सिंधुदुर्ग किल्ल्याला भेट देण्यासाठी येणाऱ्या पर्यटकांना घेऊन जाणाऱ्या जेटीची सध्या अत्यंत दयनीय अवस्था झाली आहे. या जेटीचा काही भाग धोकादायक बनला असून, पर्यटकांच्या सुरक्षिततेवर यामुळे गंभीर प्रश्नचिन्ह निर्माण झाले आहे. मोठ्या संख्येने येणारे पर्यटक सध्या याच जीर्ण झालेल्या जेटीचा वापर करत असल्याने कोणत्याही क्षणी अपघात घडण्याची शक्यता निर्माण झाली आहे.

माहितीनुसार, सिंधुदुर्ग किल्ल्याकडे जाणाऱ्या जेटीचा खालचा भाग पूर्णपणे खचलेला आहे. सुकतीच्या वेळेला हा खचलेला भाग स्पष्टपणे दिसतो. जेटीच्या या अवस्थेमुळे ती कमकुवत झाली असून, तिच्या सुरक्षिततेवर परिणाम झाला आहे. सध्या पर्यटनाचा हंगाम असल्याने मालवणमध्ये मोठ्या प्रमाणात पर्यटक दाखल झाले आहेत.

या पर्यटकांची वाढती संख्या लक्षात घेता, धोकादायक जेटीचा वापर अधिक चिंताजनक ठरत आहे. दररोज शेकडो पर्यटक याच जेटीवरून किल्ल्यावर जातात आणि परत येतात, ज्यामुळे दुर्घटनेचा धोका वाढला आहे. या गंभीर स्थितीवर तातडीने उपाययोजना करण्याची मागणी होत आहे. बंदर खात्याने या समस्येची दखल घेऊन जेटीची त्वरित दुरुस्ती करावी, अशी मागणी स्थानिक नागरिक आणि पर्यटन व्यावसायिकांकडून जोर धरू लागली आहे.