Eknath Shinde : चुकीला माफी नाही… भाजपच्या पाटलांची ‘फाईल’ शिंदे करणार रिओपन? प्रकरण काय?

मोहोळमध्ये सध्या राजकीय चर्चांना उधाण आले आहे. उपमुख्यमंत्री एकनाथ शिंदे यांनी भाजपा नेते राजन पाटील यांना त्यांच्या मुलावरील एका जुन्या हत्येच्या प्रकरणाची फाईल पुन्हा उघडण्याचा इशारा दिला आहे. “चुकीला माफी नाही” असे म्हणत शिंदेंनी ही कठोर भूमिका घेतली आहे. राजन पाटील यांचे पुत्र बाळाराजे पाटील यांच्यावर एका शिवसैनिकाच्या हत्येचा आरोप आहे. या हत्येच्या आरोपावेळी राजन पाटील हे राष्ट्रवादी काँग्रेसमध्ये होते, त्यानंतर ते अजित पवार गटात सहभागी झाले. काही दिवसांपूर्वीच ते भाजपात सामील झाले आहेत. सध्या मोहोळमध्ये शिंदे यांच्या शिवसेनेसोबत राष्ट्रवादीचा दादा गट युतीमध्ये लढत आहे. विशेष म्हणजे, ज्यांच्या मुलावर हत्येचा आरोप आहे ते राजन पाटील आता सत्ताधारी भाजपमध्ये आहेत, तर हत्येच्या वेळी ते ज्या राष्ट्रवादी पक्षात होते, तो गट आता शिंदेसेनेचा सहकारी आहे. या राजकीय विरोधाभासामुळे मोहिमेतील घडामोडी लक्षवेधी ठरल्या आहेत.