गणेशोत्सवात मुंबईत आंदोलन करणं म्हणजे… देवेंद्र फडणवीस यांचे मराठा आरक्षणावर मोठे विधान

महाराष्ट्रात उत्साहात सुरू असलेल्या गणेशोत्सवाच्या पार्श्वभूमीवर, मुख्यमंत्री देवेंद्र फडणवीस यांनी गणेश भक्तांना शुभेच्छा दिल्या आहेत. यावेळी बोलताना, त्यांनी गणेशोत्सवाच्या काळात मुंबईत आंदोलन करणे योग्य नसल्याचे स्पष्ट मत व्यक्त केले. गणेशोत्सवादरम्यान आंदोलन केल्यास गणेश भक्तांना गैरसोय होऊ शकते, त्यामुळे यावर पुनर्विचार करण्याची गरज असल्याचे फडणवीस म्हणाले.

मराठा आरक्षणासंदर्भात बोलताना, त्यांनी सरकारद्वारे मराठा समाजाच्या जवळजवळ सर्व मागण्या पूर्ण करण्यात आल्याचे सांगितले. काही मागण्या न्यायप्रविष्ट असून, त्या संविधानिक मार्गानेच पूर्ण होऊ शकतात, असेही त्यांनी स्पष्ट केले. सरकार चर्चेसाठी नेहमीच तयार आहे, परंतु कायद्याच्या आणि घटनेच्या चौकटीबाहेरील गोष्टी मान्य करता येणार नाहीत, असे फडणवीस यांनी अधोरेखित केले.