CM फडणवीसांच्या पत्रकारांशी अनौपचारिक गप्पा; म्हणाले, मी इतक्या लवकर काही…

राज्याचे मुख्यमंत्री देवेंद्र फडणवीस यांनी नागपूरमध्ये पत्रकारांसोबतच्या अनौपचारिक गप्पांमध्ये मी लवकर निवृत्त होणार नाही असे विधान केले आहे. एखाद्या व्यक्तीवर चित्रपट येत असेल तर तो निवृत्त होतो, पण आपण सध्या निवृत्त होणार नसल्याचे त्यांनी सांगितले. यावेळी त्यांनी अनेक वैयक्तिक गोष्टींवरही मनमोकळेपणाने चर्चा केली. गेले अनेक वर्षांपासून मिळालेल्या स्वागताच्या शाली जमा करून त्या वृद्धाश्रमांना देत असल्याचे फडणवीस यांनी सांगितले. तसेच, छंद जोपासता येत नसले तरी गाणी ऐकायला आवडतात, असे ते म्हणाले. सुट्टीचे कोणतेही विशिष्ट नियोजन नसल्याचे आणि विशिष्ट सुट्टी घेतल्याचे आठवत नसल्याचेही त्यांनी नमूद केले.

नागपूर त्यांना सुट्टीसारखे वाटते, असेही ते म्हणाले. त्यांना जपानी नमा चॉकलेट आवडते, असे त्यांनी सांगितले. पुरणपोळी किंवा मोदक म्हटल्यास ते सर्वत्र उपलब्ध होतात, म्हणून त्यांनी कमी उपलब्ध असलेले चॉकलेट सांगितले. यावेळी त्यांनी दुष्काळ मदत आणि दिवाळी नियोजनावरही भाष्य केले. प्रत्येक मंत्री दिवाळीचा एक दिवस कुठल्यातरी गावात शेतकऱ्यांसोबत साजरा करेल, असे आवाहन करत फडणवीस यांनी स्वतः नागपुरातील एका गावात जाऊन दिवाळी साजरी करणार असल्याचे सांगितले. देशाच्या विकासाच्या आणि संविधानाच्या विरोधात काम करणाऱ्या अराजक शक्तींचाही त्यांनी उल्लेख केला. भूसंपादनाचे काम संवादातून आणि विश्वासात घेऊन केले जात असल्याचे त्यांनी स्पष्ट केले.