Santosh Deshmukh Case: न्याय मिळेपर्यंत लढाई सुरूच…हत्येप्रकरणी मोठी अपडेट आल्यानंतर धनंजय देशमुख यांची मागणी काय?

संतोष देशमुख खून प्रकरणातील आरोपींवर आरोप निश्चित करण्यात आल्याच्या प्रक्रियेनंतर धनंजय देशमुख यांनी आपली प्रतिक्रिया दिली आहे. धनंजय देशमुख म्हणाले, आरोपींना त्वरित फाशीची शिक्षा देण्याची मागणी केली आहे. पीडित देशमुख कुटुंबाला आणि न्यायाच्या बाजूने उभ्या असलेल्या सर्वांना न्याय मिळावा, अशी त्यांची भूमिका आहे. आरोप निश्चिती झाली असली तरी, न्यायालयात आरोपींनी आरोप फेटाळले आहेत. यावेळी प्रसिद्ध सरकारी वकील उज्ज्वल निकम हे देखील उपस्थित होते. आरोपींकडून वारंवार वकील बदलणे, पुराव्यांशी संबंधित मागण्या करणे आणि सुनावणीस विलंब लावणे यांसारख्या रणनीती वापरल्या जात असल्याचा आरोप धनंजय देशमुख यांनी केला. त्यांच्या मते, या कृती आजचे मरण उद्यावर ढकलण्यासारख्या आहेत. आरोपींमध्ये पश्चात्ताप दिसून येत नाही, असेही त्यांनी नमूद केले. तपास पथकाने (CID, SIT) मुख्य आरोपींसह कटातील सहभागींची ओळख पटवून न्यायालयात आरोपपत्र दाखल केले आहे, आणि आता लवकर न्याय मिळेल अशी देशमुख कुटुंबीयांना आशा आहे.