Dhananja Munde : ओबीसी आरक्षणात का घुसायचंय? मुंडेंचा भर सभेत जरांगे पाटलांना थेट सवाल

बीड येथील ओबीसी एल्गार मेळाव्यात बोलताना धनंजय मुंडे यांनी आरक्षण आणि समाजातील सद्यस्थितीवर आपले विचार मांडले. छत्रपती संभाजी क्रीडा संकुलात झालेल्या या सभेत, त्यांनी ओबीसी आरक्षणाच्या संरक्षणाची लढाई सुरू झाल्याचे सांगितले. यावेळी ओबीसी आरक्षणात का घुसायचंय? असा सवाल करत धनंजय मुंडेंनी भर सभेत मनोज जरांगे पाटलांना थेट सवालही केला.

मुंडे यांनी एमपीएससी परीक्षेच्या निकालाचे उदाहरण दिले, ज्यात ओबीसीसाठी ४८० आणि ईडब्ल्यूएससाठी ४५५ गुण कट-ऑफ होता. या आकडेवारीनुसार, मराठा समाजातील गरीब विद्यार्थ्यांना ईडब्ल्यूएस आरक्षणाचा जास्त फायदा होऊ शकतो असे त्यांनी सूचित केले. राष्ट्रीय स्तरावरील रेल्वे भरतीतील आकडेवारी सादर करत त्यांनी ओबीसी आणि ईडब्ल्यूएसमधील गुणांमधील फरक स्पष्ट केला. अजमेरमध्ये ९ गुणांचा, अहमदाबादमध्ये ६ गुणांचा, चेन्नईमध्ये १८ गुणांचा आणि जम्मू-श्रीनगरमध्ये १६ गुणांचा फरक असल्याचे त्यांनी नमूद केले. या फरकावरून, मराठा समाजातील गरीब घटकांना शिक्षण आणि नोकरीसाठी ईडब्ल्यूएसशिवाय दुसरा पर्याय नाही, असे त्यांनी प्रतिपादन केले. ही लढाई कोणाला विरोध करण्यासाठी नसून, मराठा समाजाने १०% ईडब्ल्यूएस आरक्षणाचा लाभ घ्यावा, असे आवाहनही मुंडे यांनी केले.