Prithviraj Chavan : अमेरिकेतील Epstein files सार्वजनिक अन् जगभरात खळबळ; एपस्टिन, मोदी 2014 मध्ये भेटले! चव्हाणांचा मोठा दावा

अमेरिकेतील बहुचर्चित एपस्टिन फाईल्स आता सार्वजनिक झाल्या आहेत, ज्यामुळे जगभरातील अनेक नेते आणि सेलिब्रिटींचे धाबे दणाणले आहेत. या फाईल्समध्ये अमेरिकेचे माजी राष्ट्राध्यक्ष डोनाल्ड ट्रम्प, बिल क्लिंटन, गायक मायकल जॅक्सन आणि मिक जॅगर यांच्यासह अनेकांची माहिती समोर आली आहे. या पार्श्वभूमीवर, काँग्रेस नेते पृथ्वीराज चव्हाण यांनी पंतप्रधान नरेंद्र मोदी यांची 2014 मध्ये जेफ्री एपस्टिनशी भेट झाल्याचा दावा केला आहे.

एपस्टिन हा देहव्यापार आणि तरुणी पुरवणारा विकृत व्यक्ती असल्याची माहिती असताना, मोदींची एपस्टिनशी भेट कोणी घडवून आणली, असा प्रश्न पृथ्वीराज चव्हाण यांनी विचारला आहे. हरदीप पुरी यांचे नाव या संदर्भात समोर आले असून, त्यांच्या भूमिकेची चौकशी करण्याची मागणी चव्हाणांनी केली आहे. दुसरीकडे, काही नेत्यांनी पृथ्वीराज चव्हाण यांच्या दाव्याला केविलवाणा प्रयत्न संबोधत त्यांच्या मानसिक संतुलनावर प्रश्नचिन्ह उपस्थित केले आहे. 2019 मध्ये लैंगिक तस्करीच्या आरोपांखाली अटकेत असताना एपस्टिनचा मृत्यू झाला होता, मात्र त्याने गोळा केलेली माहिती आता सार्वजनिक होत असल्याने आणखी धक्कादायक खुलासे होण्याची शक्यता आहे.