Messi Visit Vantara : जगप्रसिद्ध फुटबॉलपटू मेस्सीची ‘वनतारा’ला विशेष भेट अन् वन्यजीव संवर्धनाचं केलं कौतुक

जगप्रसिद्ध फुटबॉलपटू लिओनेल मेस्सीने अलीकडेच भारताच्या दौऱ्यावेळी अनंत अंबानी यांच्या संकल्पनेतून उभारलेल्या वनतारा या वन्यजीव बचाव, पुनर्वसन आणि संवर्धन केंद्राला विशेष भेट दिली. या भेटीदरम्यान अनंत अंबानी आणि त्यांची पत्नी राधिका मर्चंट यांनी मेस्सी आणि त्याच्या सहकाऱ्यांचे जोरदार स्वागत केले. वनतारामध्ये प्राण्यांची ज्या पद्धतीने काळजी घेतली जाते, ती पद्धत पाहून मेस्सी खूप प्रभावित झाला. त्याने प्राण्यांची काळजी घेणाऱ्या कर्मचाऱ्यांसोबत संवाद साधून त्यांच्या कार्याचे कौतुक केले. या भेटीदरम्यान, मेस्सीने केवळ वन्यजीव संरक्षणाचे कार्यच पाहिले नाही, तर तो भारतीय संस्कृतीशीही परिचित झाला. त्याने हिंदू चालीरीतींनुसार महाआरती, विविध देवदेवतांची पूजा आणि अभिषेकही केला.

याव्यतिरिक्त, मेस्सीने वनतारा परिसरात फुटबॉल खेळण्याचाही आनंद लुटला. मेस्सीच्या या वनतारा भेटीबद्दल केंद्राकडून अधिकृत माहिती देण्यात आली असून, या भेटीमुळे अनंत अंबानी आणि मेस्सी यांच्यातील मैत्री अधोरेखित झाली असे नमूद करण्यात आले आहे. या भेटीमुळे जागतिक स्तरावर वन्यजीव संवर्धनाबद्दल जागरूकता वाढण्यास मदत होईल अशी अपेक्षा आहे.